Shillong, Nailur, 28: Uwei u samla uba ñiah thuk thuk ar shaka uba la tip kyrteng kum u Deba Basumatari, 17 snem ka rta u la khladnoh hashen na ka daw ba la jur palat ka jingmynsaw ha ka jingïatyngkhuh bad kawei ka trok Tanker ha surok NH-6 ha ka shnong Wahïajer, East Jaiñtia Hills District kaba la jia ha ka por kumba 7:00 baje haduh 7:20 baje mynstep ha ka sngi Saitjaiñ.
Ka thuk thuk ar shaka kaba u Deba Basumatari u la ñiah ka dei kaba don ïa u number AS 02 AN-5538 bad u dei na ka shnong Borbil Milanpur kaba hap hapoh ka Barpani Bagan, Police Station, Kachua Kamrup, Nagaon, Assam. Une u samla u la ïakynduh ïa kane ka jingjia ba sngewsih katba u dang wan na karkhana Goldstone da ka jingthmu ban leit sha karkhana Star Cement hynrei ynda la poi ha ka shnong Wahïajer ha kawei ka jaka kaba khun hajan ka karkhana JUD Cement, u la ngat pynban ha kane ka apot da ka jingïatyngkhuh bad kawei ka trok Tanker kaba don ïa u nomba NL01L-0813.
Ki Pulit kiba la ïoh jingtip halor kane ki la leit ban pynlong ïa ka jingtohkit bad ban pynkit noh ïa ka metïap sha Khliehriat Civil Hospital. Hadien ba la pyndep ïa ka jingleh postmortem, ïa ka metïap la aiti noh sha ki bahaï ing hasem ban pyndep ïa ka jinglehniam kaba khatduh.
Ki Pulit ki la pyntip ba u nongñiah jong ka trok u Diganta Borauh, 30 snem ka rta na ka shnong Kanubari Balijan Ouguri Pathar, Charaido District, Assam u la don beit ha ka jaka ba jia ka jingaksiden bad ki Pulit ruh ki la rah noh ïa u sha thanat ban leh ïa kaba donkam katkum ka aiñ.
Ki Pulit ki la bthah ruh ïa ki bahaïing hasem ba kin ujor da ka ejahar halor kane ka jingjia.
