Shillong, Jylliew, 24: Ki nongïalam jong ka Khun Hynniewtrep National Awakening Movement ha ka 24 tarik Jylliew, 2025 ki la leit aiti da ka jingthoh sha u Myntri Rangbah ka Jylla u Conrad K. Sangma ban dawa ïa ka Sorkar ba kam dei shuh ban shah ïa ki kali Tourist kiba nabar ka jylla ki bym pat register ïa ki kali hapoh ka Jylla ba kin rung sha ki jaka jngohkai pyrthei kiba don ha kylleng ka jylla.
Ha ka jingïakren bad ki lad pathai khubor, u Working President jong ka KHNAM u Bah Thomas Passah u la ong ba kane ka jingtyrwa jong ka seng kam dei satia kaei kaei kaba thymmai hapoh ka ri hynrei kum ka seng ka la pynpaw ba ka sorkar ka dei ban shim nuksa na ka jylla Sikkim ba ki kali Tourist ki bym pat register bad ka sorkar ha ka jylla Sikkim ym shym la la shah satia ba kin kit ïa ki nongjngohkai pyrthei sha ki jaka jngohkai.
U la ong ruh ka sorkar ka la dei ban pynieng noh ïa ki kali Tourist kiba wan nabar jylla ha ISBT Mawiongrim bad ban ailad noh ïa ki kali Tourist jong ki trai jylla ban kit bujli ïa ki nongjngohkai pyrthei.
