Shillong, Nailar, 23: Ka Youth Hostel Association of India (YHAI) Meghalaya State Branch ha ka sngi Saitjaiñ ka la rakhe ïa ka lyngkhuh ba 114 snem da ka shad ka tem ban pynlong ïa ka prokram kaba jop.
Ka lyngkhuh snem jong ka YHAI ka hap ha ka 24 tarik hynrei ba ka dei Sngi u Blei la rakhe noh ha ka Sngi Saitjaiñ namar kan don ruh ka ilekshon jied nongkitkam thymmai jong ka YHAI, Meghalaya.
Ha kane ka sngi ka National Observer bad Chairperson jong ka YHAI, Assam Maraumi Goswami ka la long kum ka Kongsan ha ryngkat ka jingdonlang jong u State Chairman u Bah E.D Nongsiang, ki nongkitkam jong ka YHAI Meghalaya bad ki dkhot na ki District Unit, lem bad ki khynnah skul kiba ïashim bynta ha ki jingïakob bapher bapher.
Ka Maraumi Goswami haba kren ha ka jingïalang ka la pynpaw ïa ka jingkmen ba ïadonlang ha kane ka sngi khraw ban rakhe ïa ka jingdap 114 snem jong ka YHAI kaba la seng da u Richard Schirrmann u nonghikai na ka ri Germany ha u snem 1912.
U Bah E.D Nongsiang ula ïathuh ba ha ka jingdon bynta ha YHAI ula ïohlad ban shang kylleng ka ri bad shabar ri.
U la pynshlur ïa ki khynnah samla ban pynïasoh bad ka YHAI khnang ba kin ïoh ïa ka kabu ban leit shang pyrthei kylleng ka ri, namar ban leit hi shimet ka ktah ïa ka jinglut jingsep kaba bun kumta kiba sngewtynnad ban shangkai ki lah ban ïasoh bad YHAI hynrei ki donkam ban trei shitom ban ïoh shang pyrthei.
U la ïathuh ba ka YHAI Meghalaya ka ju pynlong ïa ki prokram bapher kum ki jingleit ïaid kjat bad rung krem ban lap ïa ki jingphylla jong ka mariang ha ka jylla Meghalaya bad ki briew na kylleng ki jylla ki ju wan ïashim bynta ha kine ki prokram ba ju pynlong ha u bnai Nailar, Risaw manla u snem.
Ha kane ka sngi la sam ruh ïa ki khunsnam ïa ki nongjop ha ka jingïakob dro dur ba la pynlong kum shim bynta ka jingrakhe ïa ka sngi pynneh mariang ha u bnai Jylliew bad kiwei kiwei.
Ha kane ka sngi la ïoh jingkren ruh na u State President ka YHAI u Bah R Rapthap, u State Secretary u D. Chakraborty bad kiwei kiwei.
