Shillong, Nailar, 26: Ka Kynhun Myntri jong ka Sorkar Jylla ka la pdiang ïa ka kaiphod jong ka Meghalaya Public Service Commission Reforms Committee (MPSCRC), kaba thmu ban pynjanai ïa ka rukom treikam, ka jingmih, bad ka jingkhuid jingsuba ha ka rukom thungkam ha ka Meghalaya Public Service Commission (MPSC).
Ïa ka kaiphod la aiti da ka Komiti ba la khlieh da u Principal Secretary u Bah F.R Kharkongor.
“Ka komiti ka la aiti ïa ka kaiphod jong ka bad ngi la pdiang ïa ka kaiphod baroh ha ka Kynhun Myntri mynta ka sngi,” la ong u Myntri Rangbah ka jylla u Conrad K Sangma ha ki lad pathai khubor ha ka sngi Baar.
U Sangma u la pyntip ba ka Kynhun Myntri ka la ai jingmut ban buh ïa ki CCTV bad ki kor shon dur ha ka por ba pynlong ïa ka interview ban pynthikna ïa ka jingkhuid bad ka jingkitkhlieh.
“Nalor (ki jingai jingmut jong ka komiti), ka Kynhun Myntri ka la ai jingmut ba dei ban pyndait ïa ki CCTV bad ka jingbuh rekok kaba biang ha ka por ba pynlong ïa ka interview bad ki camera ki dei ban don hangta khnang ba lada don kano kano ka jait jingkylli ne kano kano ka jingeh kaba mih lah ban pynphai sha kita,” u la ong da kaba pynthikna ba shen yn sa pynpaw paidbah ïa ka kaiphod kaba khuid bad kaba shai.
Haba pynpaw ïa ki jingpynkylla, u Sangma u la ong ba ki don ki lad ki lynti kiba lyngkot bad ki lad ki lynti kiba jrong ba la ai jingmut da ka komiti.
Ki lad ki lynti kiba lyngkot ki kynthup ïa ki lad ban don bun tylli ki Board na ka bynta ka jingïakren kaba kham stet, ban buh ïa ki kyndon ïakren, ka jingpynbna ïa ki tiar ki tiar bad ki jingkitkhlieh da u Chairman bad ki dkhot, ka jingthaw ïa ka Cell jong ki jingujor, ka jingpynpaw paidbah ïa ki Marks ba la ïoh da ki kyrtong, ka jingpyllait ïa ki jubab hadien ka eksamin bad kiwei kiwei.
“Ka por ba kyrpang ban ai na ka bynta ban tynhuh ïa ki jubab bad ban weng ïa kino kino ki jingujor kiba ïadei bad ka jingbamsap bad ka jingpeitngor ha ka MPSC lyngba ka Meghalaya Lokayukta Act, 2014,” la ong u Sangma da kaba pynskhem ba ym shah ban pynkylla ha ka rukom thungkam shisien ba la sdang ïa ka kam.
Ha kaba ïadei bad ki sienjam ba lyngkot bad ba jrong, u Myntri Rangbah u la ong ba ka komiti ka la ai jingmut ban leh ïa ki test da ka computer, ban pynkhlaiñ ïa ki Cell jong ka MPSC ha Jowai ne ha Tura, ka Combined Competitive Examination bad ban sangeh noh ïa ki Optional Paper.
“…ki combined competitive examinations, kaba mut ba ïa ka eksamin na ka bynta kajuh ka kyrdan bad kajuh ka scale lah ban pynïasoh lang khnang ban lait na kano kano ka jait jingpynkylla ne jingpynslem. Ha kaba ïadei bad ka jingpynsangeh ïa ki optional paper, ngi ladep ban leh ha ka sien kaba ladep na ka bynta kiwei pat ki eksamin ha Meghalaya Civil Services (MCS) bad ngin sa leh ruh kumjuh na ka bynta ki eksamin ki ban sa long ha ki sngi ban wan,” u la ong.
