Shillong, Nailar, 29: Ka jingshimkhia bad ka jingtreishitom jong ki nongïalam shnong khamtam u Sordar ka shnong ka ju pynlong ïa ki nongshong shnong bad ïa ka shong ka thaw hi baroh kawei ba kin ïoh jingmyntoi la ka long ha ki kam pynroi ne ki skhim sorkar bad kiwei kiwei de ki bynta.
Ïa kane ka sakhi ruh lyngba ki kam kiba bha jong u Babu Sirian Wahlang u Sordar ka shnong Nongsohpian ka shnong kaba jngai tang kumba 7 kilomitar na sor Nongstoiñ, West Khasi Hills District ha kaba nalor ka jingpyntreikam bha ïa ki skhim Sorkar sha ki nongshong shnong une u Sordar u la pynlut ruh da ka pisa na pla lajong ban pynshna ïing ïa kawei ka longkmie hapoh ka shnong.
Shwa ban aiti ia ka iing sha ka kong Dinaris Marngar la kyrkhu kyrdoh da u Asst. Parish Priest jong ka Divine Savior Parish Nonbah, u Phadar Dominic Marthong ryngkat ka jingïadonlang ki nongïalam ka shnong bad kiwei kiwei.
