Shillong, Nailur 09: U Myntri Rangbah ka jylla u Conrad K Sangma u la pyntip hapoh ka Ïingdorbar ba ka sorkar jylla ka dang trei ïa ka kam ha kaba ïadei bad ka Shillong water supply scheme kaba thymmai, ha kaba ïa kane la mang kumba T. 700 klur.
“Ka new Shillong water supply ka la don ha ka lynti ban lah ban pyndep noh bad ngi kyrmen ba kan ai ïa ka jingïarap ha kaba ïadei bad ka jingsam ïa ka um ha Shillong bad ha ki thaiñ kiba marjan,” ïathuh u Sangma.
U Myntri Rangbah u la pynpaw ruh ba ka Wahrynthem water project, ka ban pyndap ïa ka jingsam ïa ka um kumba 33 million liter ha ka shi sngi, na ka liang ka sorkar ka la pyrkhat ban shim kam bad kumjuh ruh ïa ka wah Umngot kaba ha Dawki. U la ong ba ïa kine ki project la khmih lynti ba kin ai ki lad jingïarap ha kaba ïadei bad ka jingeh ha ka kam sam um sha ki jaka.
Ha kaba ïadei bad kane, na ka liang u nongïalam ka liang pyrshah u Mukul Sangma u la pynpaw ïa ka jingsngewkhia ha kaba ïadei bad kane ka jingneh jong ki tyllong um da kaba kdew ruh ïa ka jingkylla jong ka suiñbneng.
U Myntri Rangbah haba jubab ïa kane u la ong ba ka jylla ka pyrshang ruh ban wad ki lad jingïarap na ki externally aided projects (EAPs) kiba treikam beit na ka bynta ki tyllong um.
U Myntri Rangbah u la banjur ruh halor ka jingdonkam ka Meghalaya Climate Council, kaba la khmih da ma u bad kaba kynthup ruh ïa kiwei pat ki tnat.
“Ïa kane ka council la ïalam da ka state water policy, jong ka snem 2019. Ngi dei ka jylla kaba nyngkong ban don ïa kane ka water policy,” ong u Sangma da kaba bynrap ruh ba ka sorkar ka dang trei ïa ka kam na ka bynta ki tyllong um khamtam ha kaba ïadei bad ka jingkylla jong ka suiñbneng.
Kham ha shwa ha ka jingjubab ha kaba ïadei bad kane ka kam u Myntri ba khmih ïa ka Public Health Engineering (PHE) u Marcuise N Marak u la pynbna ba la khmih lynti ba ïa ka Greater Shillong Water Supply Scheme (GSWSS – III) yn pyndep ha u bnai Lber jong u snem ban wan.
“La khmih lynti ruh ba ha nongbah Shillong kane ka jingeh kan sa duna hadien ba la pyndep ïa ka GSWSS (Phase-III),” u la ong.
U la ïathuh ba ka jingdonkam jong ka umbam umdih ha Shillong ba kynthup ïa kiwei ki thaiñ ki bym hap hapoh ka Greater Water Supply Scheme (Phase I & II) ka long 5,58,30,000 litre. Baroh ka um kaba donkam ha Shillong ka long 4,17,80,000 Litre.
Ha kaba ïadei bad ka Mawlai, u Marak u la ong ba 64,75,000 litre ka umdih kaba la sam manla ka sngi.
“Haba ïadei bad ka Mawlai, ka scheme kaba hapoh ka JJM kaba la tip da ka Umshillong, Lummawnei, Umthlong, Mawïong & B1-13 WSS ka dang ïaid bad ba kynthup ruh ïa kiwei pat ki skhim,” u la bynrap.
