Shillong, Nailur, 22: Ka Organising Committee jong ka Mawlai Games and Literary Fest ha ka Lah Sngi u Blei ka la pyllait paidbah ïa u Logo ne Shab na ka bynta ka Mawlai Games bad ka Literary Fest ha ka jingïalang kaba la long ha Hellick Lina Mini Stadium.
Ïa u Logo la pyllait paidbah da u Rangbah Shnong ka Mawlai Nonglum u Bah J.S War ryngkat ka jingdonlang jong u Chairman u Bah G.S Kharbuli, u Secretary u Bah T. Lynshing, u Organising Secretary cum Spokesperson Bah Elmer R. War, ki nongkitkam jong ki komiti bapher bapher ryngkat ka jingdon lang u MLA u Bah Brightstarwell Marbaniang bad u MDC Bah Eddieson Kharumnuid.
Ha kane ka lympung ïalehkhai kaba la buh ban pynsdang naduh 5 tarik haduh ka 10 tarik, Kyllalyngkot 2026, yn sa kynthup ïa ki jingïalehkai kum ka Football, Athletics, Badminton, Boxing, Basketball, Arm Wrestling bad Traditional Archery katba ha ka Literary Fest yn kynthup ïa ka jingïakop ïatyrko, ïakob shut jabieng, kren paidbah bad ka tang shi kyntien ïa kaba yn ailad ïa baroh ki samla shynrang bad kynthei na baroh ki 24 tylli ki shnong kiba hap hapoh ka jylli jong ka Mawlai Constituency.
Ka jingthmu jong kane ka lympung ka long ban tehsong ïa ki samla ka shnong Mawlai baroh kawei bad ban plie lad ïa ki samla ba kin ïashim bynta lang ha ki jingïalehkai bapher bapher ha kane ka tamasa.
