Shillong, Jymmang, 27: Ka Seng Congress kaba shong ha ka Liang Pyrshah ka la buh 9 tylli ki jingkylli ïa ka jingsynshar ba la kynjoh 9 snem kynthih jong ka Bharatiya Janata Party (BJP) ïa ka ri India naduh ba ka la shimti ïa u lakam synshar ha u snem 2014.
Ka Media Coordinator jong ka All India Congress Committee (AICC) ka Bobita Sharma kaba long ruh ka Vice President jong ka Assam Pradesh Congress Committee (APCC) ha ka jingiakren bad ki lad pathai khubor ha Congress Bhavan, Shillong, ha ka sngi saitjaiñ ka la pynbna sha ki paidbah nongshong shnong jong ka ri ba ki khyndai tylli ki jingkylli kiba ka Seng Congress ka la buh hakhmat ka BJP ki long, halor ka ioh kot ka kot, ka rep ka riang bad ki nongrep, ka bamsap bampong bad ka jingthungkam ïa ki briew kiba don jingiadei khlem da bishar ïa ka kyrdan pule, ka jingkyntur pud ka ri China sha u pud u sam jong ka ri India bad ka jingshong shngaiñ ka ri India, ka jingpyndonkam da ka saiñpyrthei ban pynkha ia ka jingia-isih ban ïoh jingmyntoi ha ka saiñpyrthei, ka jingsngap jar jong ka Sorkar NDA ba la ïalam da ka BJP ïa ka jingshah thombor ki kynthei, ki dalit, ki Schedule Caste, ki Schedule Tribe, ki Other Backward Classes bad ki rit paid, ka jingpyntroiñ ïa ki nongrim jong ka riti synshar jong ka ri bad ïa ki dorbar synshar paidbah ha kine ki khyndai snem, ka jingbuh da ki kyndon bapyrkhing ïa ki song jingiarap sha kiba duk bad ïa ki riewlum bad kaba khatduh eh ka Congress ka la buh jingkylli ruh halor ka jingkyntait ka sorkar ba la ïalam da u Narendra Modi ban siew bailutksan sha ki bahaing hasem jong ki 40 lak ngut ki briew kiba la duhei ïa la ka jong ka jingim na ka jingiabit ia u khniang jingpang Covid-19.
