Shillong, Nailar, 4: U Chairperson jong ka Meghalaya Human Rights Commission u Justice T. Vaiphei ha ka sngi thohdieng u la hiar jurip kyndit ïa ka District Prison and Correctional Home, Jowai.
La synran lang ïa u, da ki dkhot ka MHRC ba kynthup ïa B. Giri, u PJP Hanaman bad u Secretary u Bah F.M Dopth.
Ka Commission ka la lap ruh ba ka District Prison and Correctional Home, Jowai ka la khapngiah namar ba la shna ïa kane ka phatok ban set tang 120 ngut ki koidi hynrei kane ka phatok mynta ka don haduh 298 ngut ki koidi.
Ka Commission ka la bthah ïa u Deputy Superintendent jong ka District Prison and Correctional Home, Jowai ban pynkylla shipor ïa ka Hall jong ka Vocational Training sha ka Ward ban pynsah ïa ki koidi khnang ban weng ïa ki jingeh na ka jingkhapngiah jong kane ka phatok.
Ïa ka jingai jinghikai la bthah ban pynkynriah noh sha ka Video Conferencing Room kaba long ka jaka kaba kham kylluid.
Ka Commission ka la pynpaw ruh ba la donkam ban shna pynheh ïa kane ka phatok da ka Sorkar khnang ban weng ïa ka jingkhapngiah jong ki jaka sah ki koidi.
Ka jingdon tang kawei ka paiñkhana ha kawei pa kawei ka Ward ka la buh jingeh ïa ki 50 ngut ki koidi kiba don mynta ha kane ka phatok bad la donkam ruh ban shna shuh shuh ïa ki paiñkhana ha manla kawei pa kawei ka Ward.
Ka Commission ka la bthah ïa u Deputy Superintendent jong ka Jail ban phah ïa ka kaiphod halor ki mukotduma ba dang sah pongding jong uwei pa uwei u koidi khnang ba ka Commission kan dup lah ban leh eiei bad ki bor jong ka aiñ na ka bynta ban pynstet ha kaba ïadei bad ki mukotduma. Kane ka sienjam kan pynduna ruh ïa ka jingkhapngiah jong ka phatok.
Ka Commission ka la pynpaw ïa ka jingbym sngewhun ïa ka jingbym don jong u Medical Officer jong ka Jail ha kane ka jingleit jurip namar ba ki don bun ngut ki koidi kiba donkam ïa ki jingïasyllok.
