Khliehriat, Nailar 08 : Ki nongshong shnong jong ka Elaka Narpuh, East Jaintia Hills district ha ka 8 tarik u Nailar, 2023 ki la pynlong da ka jingiakhih ban pynpaw pyrshah ia ka jingbym lah jong ka National Highway Authority of India bad ka Sorkar Jylla ban shna pynbha ia ka surok National Highway-06 kaba la jot rathai bad kaba la buh jingeh ia ki paidbah ha ka leit ka wan bad ka rah ka rong.
Ki paidbah hapoh ka jingialam jong ka Khasi Students’ Union (KSU) Narpuh Circle bad ki Waheh Shnong jong ka Elaka Narpuh ki la ia mih paidbah ryngkat bad ki plakad bad ki jingthoh kiba pynrem jur ia kane ka jingleh bym suidniew jong ka National Highway Authority of India bad ka sorkar jylla da kaba ialum lang ha ka khyrdop khrong khajna jong ka National Highway Authority of India kaba don ha Lumshnong.
