Shillong, Naiwieng, 27: Ka Hynñiewtrep Achik National Movement (HANM) kan pynlong ia ka Executive Committee ha ka 2 tarik Nohprah 2023 ha ophis trei kam jong ka seng ha ka por 1.30 baje nohphai sngi ban iakren ia ka shithi kaba la wan na ka sorkar pdeng lyngba ka Ministry of Home Affairs halor ki dorkhas bad ka jingiakhih ba ka seng ka la pynlong ha ka 3 tarik mynta u bnai ha Jantar mantar, New Delhi.
Ha kane ka jingialang yn ia kren ruh ban pynthymmai ia ki komiti bapher bapher kiba don hapoh ka seng, ka komiti ba peit ia ka khyndew ka shyiap, ka komiti ba dei peit ia ka kam pisa, ka komiti ba peit ia ki lad iohkam iohjam bad ka komiti ba peit ia ka jingpyniaid beit hapoh ka seng.
Ha kane ka jingialang yn ia kren ruh kumno ban pynkhlain ia ka jingtreikam jong ka Central Executive Committee bad kiwei kiwei ki kam lada don ban ia kren.
Ka phang pdeng jong ka jingiakren ha kane ka jingalang kan long halor ki ar tylli ki shithi kiba la wan na ka Sorkar Pdeng hadien ba ka seng ka la leit ban ai ia ki dorkhas bad ka jingiakhih kaba la pynlong ha Jantar Mantar, New Delhi, ong u kyrwoh ba la phah da u Bah Venus Rangsliang, Nongaiktien ka HANM seng kmie.
