Shillong, Rymphang, 14: Ka War Jaintia Students’ Union (WJSU) Amlarem, ka pdiang sngewbha ia ka rai jong ka Sorkar Jylla ban thaw da ka Standing Coordination Committee (SCC) khnang ban wanrah ia ka jingiasngewthuh jingmut hapdeng ki shipai BSF bad ki paidbah kiba shong basah ha ki shnong khappud ka ri India bad ka ri Bangladesh.
Ka Sorkar Jylla ka la shim ia ka rai ban thaw ia ka Standing Coordination Committee (SCC) hadien ba u Symbud Myntri Rangbah ka Jylla uba khmih ia ka tnat Kam Pohing u Bah Prestone Tynsong u la khot da ka jingialang ha ka sngi Baar ia u IG BSF u H. Dhilon, ia u DGP ka Jylla u Dr. LR Bishnoi bad ia ki nongialam shnong ban iakren halor ka jingkynnoh leh tohmet jong ki shipai langrut BSF ia u officer incharge ka Muktapur Veterinary Dispensary, u Dr. Seiboklang Buam kaba la jia ha ka 11 tarik mynta u bnai.
“Ha kawei pat ka liang ka seng kam sngew iahap ba kum kine ki komiti kin don ha ki Subdivisional Level namarba kane kan ym wanrah ia ka jingiasngewjan hapdeng ki shipai iada khappud bad ki nongshong shnong ba sah ha ki shnong khappud,” la ong u Publicity Secretary ka WJSU ha u kyrwoh ba la phah sha ki lad pathai khubor.
“Ka seng katkum ka jingthoh ba la ha u Assistant Commandant ki BSF, Muktapur, ha ka 12 tarik mynta u bnai bad ai kopi ruh ha u Sub-Divisional Officer (SDO) Amlarem Civil Subdivision, ka seng ka kwah bad ka thrang ba ha manla ki Asistant Commandant Level kin don kum kine ki komiti hapdeng ki shipai Border Security Force (BSF) bad ki Rangbah Shnong khappud hapoh ka pud treikam jong u Asstt Commandant,” la ong ka seng.
“Halor ka jingmut jong ka Sorkar Jylla ban thaw ha ki Sub-Divisional Level kan ym wanrah ia ka jingia sngewjan hapdeng ki shipai iada khappud bad ki paidbah nongshong shnong ha ki thaiñ khappud baroh kawei,” la ong ka seng bad bynrap, ‘seng ka seng kan sa leit ban iakynduh ia u Symbud Myntri Rangbah uba peit ia ka tnat kam Pohing ban iakren halor kane ka bynta.”
