LEH MATLAH KA SORKAR MDA ÏA KA JINGJOT KA SUROK NH-6 BAD SUROK SUTNGA-SAIPUNG
Shillong, Nailur, 09: Ka Synjuk Waheh Shnong East Jaintia Hills District ka la pynpaw ia ka jingbitar halor ka jingbym maramot jong ka Sorkar Jylla ia ka surok National Highway-6 bad ia ka surok Sutnga-Saipung kiba la sniew shaba palat pud kum ba long mynta.
Ha ka Executive Committee kaba la long ha Community Hall, Khliehriat West, ka Synjuk ka aipor tang ar taiew ia ka Sorkar Jylla ba kan maramot ia kine ki ar tylli ki surok kiba long u budlum jong ka leit ka wan jong ki paidbah ka rilum Jaintia.
Ha u kyrwoh ba la pyllait da u President ka Synjuk u Ma Hambertus Nongtdu, u la pynpaw ba ka surok National Highway-6 lei lei naduh Soomer, West Jaintia Hills haduh Malidor, East Jaintia Hills ka la jot rathai haduh katta katta ha kiba bun ki bynta. Kumba ka long mynta, ha kiba bun ki bynta jong kane ka surok, la dap sa tang ki thliew, ki pung um baheh bad barit kiba la pynjynjar shikatdei eh ia ka leit ka wan jong u paidbah.
“Ka Surok NH-6, ka dei tang ma ka, ka budlum jong ka leit ka wan jong ki paidbah na kylleng ki jylla ha ka ri India, khamtam eh ia kiba na Northeast India. Hynrei kumba ka long mynta, kane ka surok, ka la buh ia ki paidbah nongleit nongwan baroh ha ka jingjynjar trah bad ruh ha ka jingma kaba khraw na ka jingdheng kali, ka jingsniew kali hapdeng surok, na ka jingshem lanot kiba pang ba shitom bad ruh na ka jinglah ban mih ki jingjia ba sngewsih na ka jinghap ban iaid lyngba lane kiar ia ki thliew ki pung um kiba heh hapdeng surok,” ong u Ma Hambertus Nongtdu.
“Kaba phylla ka long ba ka Sorkar Meghalaya ka tip bha ia rukom long jong ka surokbah NH-6 bad jong ka surok Sutnga-Saipung, tangba tip don aiu shalyndet kaba pynlong ia ka Sorkar ban shu sngap jar khlem leh eiei halor ka jingjot jong kine ki ar tylli ki surok tad haduh mynta ka sngi. Kane ka jingkuman jong ka Sorkar Jylla ka dei ka jingibeiñ bad ka jingkheiñ poh ia ki paidbah bad khamtam eh ia kiba na East Jaintia Hills kiba hap ban mad ia ki jinglanot manla ka sngi namar ka jingsniew shaba palat ka surok,” la bynrap u kyrwoh.
U President ka Synjuk u la pynkynmaw, ha ka 2 tarik, Nailar, 2023, ki nongialam ka SWSEJHD, ki ladep iakynduh kyrpang bad aiti ruh ia ka dorkhas ha u Myntri Rangbah ka Jylla u Conrad Kongkal Sangma bad kawei na ki mat ba hakhmat eh kaba la iakren hakhmat jong u, ka long ban maramot noh kloi kloi ia ka surok NH-6 bad ia ka surok Sutnga-Saipung ha kaba u Myntri Rangbah ruh u la kular hakhmat ka synjuk ban leh kloi ia kata.
“Hynrei, mynta la tam shibnai ym don ba dak eiei ruh em ban maramot ia kine ki surok, khamtam ia ka surokbah NH-6 kaba long u thied snam jong kiba bun ki jylla ha ri India. Kane ka jingleh jong ka Sorkar Jylla, ka la pynbitar ia ka Synjuk bad ia u paidbah jong ka East Jaintia Hills kat haduh ba ka synjuk ka la hap ban shim ia ka rai kaba tyngeh ia mynta,” bynrap shuh shuh u President ka synjuk.
Lyngba une u kyrwoh khubor, ka SWSEJHD, ka phah ia ka khubor kaba shai kdar sha ka Sorkar jylla da kaba ai por hapoh ar taiew thik naduh ba la pynmih ia kane ka khubor ba ka Sorkar Jylla ka dei ban maramot noh ia kine ki surok.
“Lada jia ba ka Sorkar Jylla kam leh eiei ia kine ki ar tylli ki surok, ka Synjuk, kan sa shim da kawei pat ka rai kaba tyngeh bha ban pynpei shkor ia ka Sorkar Jylla bad lada mih kano kano ka jingjia ka bym sngewtynnat, ka Sorkar Jylla kan hap ban shim hi ia ka jingkitkhlieh,” la byrthen ka Synjuk.
