Ka shnong Mawtngam, South West Khasi Hills District ka dei kawei ka shnong ba la ju bna nam hapoh ka thain bad ha ki jingthoh kum ka shnong ba ju shong ju sah u Syiem ialeh laitluid pyrshah ia ki dohlieh kata u Sngap Sing Syiem. Kane ka shnong ka jngai kumba 20 km eiei na Mawkyrwat kaba dei ka Head Quarter jong ka District hynrei ka dei na kawei ka shnong bym pat lait kali.
Dang ha kane ka snem kane ka shnong ka la ioh ia ka mang tyngka napoh ka Border Area Department ban shna ia ka surok na Nongeitser haduh Mawtngam hynrei kata ka mang tyngka ka dang lah ban pynpoi tang kumba 1200 metres eiei (1.2 km). Kumta, hadien ba la lap ba kane ka mang tyngka kan nym lah ban pynpoi surok sha kane ka shnong kumta na ka liang ka shnong Mawtngam, ka KSU South West Khasi Hills District bad ka KSU Mawkyrwat Circle lem bad ki katto katne ngut ki riew rangbah kim banse ban shim iaki sien jam ban leh hi noh da kaba ia synniang ban trei iaka surok kaba sah sa 1400 metres eiei (1.4 km)
“Ngi la leh ia kane kum shibynta ban niew burom ia ka nam ka burom une u riewkhraw ka Jaitbynriew bad kum shibynta ban ia don bynta lang ban ia kit ia bah iaka khia ka shon ki paitbah nongshongshnong” – KSU.
Watla lyngba ka mang tyngka ka sorkar lem bad kita ki jingsynniang na ka shnong, ki riew rangbah bad ka KSU la lah ban pom surok hynrei kam pat biang bad ka KSU ka dawa na ka sorkar ba kan siang rong bad ban mang tyngka ruh iaka surok sha Nongeitser.
Ha South West Khasi Hills District ia ka 30 tarik u naiwieng la ju niew kum ka Sngap Syiem Day bad ka dei ruh ka sngi Shuti (District Holiday) hynrei haba peit ia kane ka shnong ka dang duna ha baroh ki liang bad tang ka seng kaba la leit sha kane ka shnong ban tei ia u mot sahnam jong une u Syiem la katto katne snem mynshwa.
Kane ka long ruh kum ka nuksa ba ka Sorkar ka dei ban phai khmat lem sha ki thain nongkyndong bad khamtam eh sha kane ka shnong.
