Ki nongialam ka KSU Central Executive Council hapoh ka jingialam da u President Rangbah jong ka, u Samla Lambokstarwell Marngar ha ka jingsynran lang u Samla Biangbor L.Paliar Vice-President KSU, Samla Pynshai Rani Publicity Secretary, Samla Pynkmenlang Sanmiet bad Samla Iashanborlang Mukhim ki Assistant Organising Secretary, ki la hiar sha nongbah Delhi ban pynskhem ia ki Nongkitkam ba Thymmai jong ka KSU Delhi Unit ha ka 29 tarik u Iaiong 2023 ha Meghalaya House New Delhi. Ha kaba ka Samla Marbiang Khongwir ka lah shah jied kum ka President bad u Samla Nicholas Chyrmang kum u General Secretary ryngkat lang bad kiwei kiwei ki para nongkit kam.
Ha kane ka juh ka sngi ka la don ruh ka jing ia kynduh lang jong ki khun u Hynniewtrep kiba pule bad kiba trei ba ktah ha Nongbah Delhi naduh ki Longkmie ki Rangbah bad ki Samla halor ka phang pdeng “U Prew ka Imlang Sahlang ka Mationg ha ka lyngit ka por”, ha kaba la wan ban sakhi lang da u Bah Hamletson Dohling u nongialam barim ka KSU bad uba long mynta u nongaibuit jong u CM ka Jylla Meghalaya. Kane ka jingiakynduh lang ka long ruh shi bynta ban wanrah ia ka jingiaithuh, ka jingiatylli bad ka jingiajuh iajan kum ki paradoh parasnam kiba sah jngai na la ka Ri I Mei I Pa.
La pyn shongshit ia kane ka jingialang da ka ka Jing Shad Tynrai bad ka Drama Lyngkot ha lor u Sier Lapalang kaba la pynbit pynbiang da ki Dkhot ka KSU Delhi.
La pyn Shngaiñ bad sakhi lang ha kane ka sngi da ki Paralok Riewlum jong ka Thaiñ Lam Mihngi kiba shong ba sah ha Nongbah Delhi.
