KAM DEI KA JINGPYNKUPBOR, ONG U BAH PALA
Shillong, Lber 17: U nongïalam ka Meghalaya Pradesh Congress Committee (MPCC) Bah Vincent H. Pala uba long u MP na Shillong u la ong ba ka jingshim rai jong ka National People’s Party (NPP) ban pynïeng da ka Dr. Ampareen na Shillong bad ka Agatha Sangma na Tura kam dei satia ka jingpynkupbor ïa ki kynthei hynrei ka dei namarba ka NPP kam don shuh da kawei ka lad.
U Bah Pala u la ong ba ka Congress ka la leh kham bha ban ïa kino kino ki party haba kren shaphang ka jingai bor ïa ki kynthei. U la ong ba ïa ka Women Reservation Policy la sdang da ka Congress bad ym da kiwei ki party.
“Da kaba shu pynïeng da ki longkmie kum ki kyrtong na baroh artylli ki konstituensi nga tharai ba ka NPP kam don shuh da kawei ka lad naba ym don kiwei pat kiba la khreh ban ïakhun na Shillong. Ki hap ban ïoh da kiwei. Ki hap ban pynkylla ïa ki kyrteng jong ki kyrtong la palat 2 sien kumta nga tharai kam dei kaba la thmu ban pynkup bor ïa ki kynthei hynrei ba kam don da kawei pat ka lad,” u la ong.
“Ka Agatha ka dei ka MP kaba mynta kumta ki khlem ai sha ka kynthei bad ki la dep ai lypa ïa ka mynshwa. Kumta phi peit ha kata ka laiñ ka Congress ka kham long ka seng kaba khambun ban pynkup bor ïa ki kynthei ban ïa kino kino ki party,” ong u Bah Pala.
Lah ban pynkynmaw hangne ba ka NPP ka la pynïakhun da ka Myntri Sorkar bad ka MLA napoh ka East Shillong ka kong Ampareen Lyngdoh na Shillong Parliamentary Seat.
