Shillong, Nailar, 31: Ka Ranikor Area Farmers Association (RAFA) ha ka sngi palei ka la leit pynsngew sha ki tyndong skhor jong u Deputy commissioner ka South West Khasi Hills Distirct u Bah T. Lyngwa halor ka jingshah pynjot ki marrep ha ki Hati khlaw kaba la jia la bun sien bad kaba wanrah ia ka jingduhnong kaba khraw ia ki nongrep jong ki shnong kiba don ha ka thain Ranikor.
Kane ka seng ki nongrep ba la lamkhmat da u President u Bah Michael Donald Lyngdoh bad u Secretary u Bah Kyrmen Kharryja ha ka jingiakren bad u Deputy Commissioner, ka la kyrpad ia ki bor sorkar ban beh noh ia kine ki mrad khlaw namarba ka jinghiar thma jong ki Hati khlaw ka buh jingma ruh wat ia ka jingim jong ki briew kiba leit sha ki lyngkha ki risai.
Kine ki nongialam ki la iathuh ba u Deputy Commissioner u la kular ban shimkhia ia kane ka jingpynsngew jong kane ka kynhun ki nongrep khnang ban iada ia ki jingthung jingtep bad ia ki mynsiem briew.
Ha kajuh ka por, ka seng ka la ai por ia ki bor sorkar ban pynkynriah noh mardor ia ki hati khlaw sha kiwei pat ki jaka hynrei lym kumta ka seng kan ym shim jingkitkhlieh lada jia eiei.
