Shillong, Naitung, 03: Ka Meghalaya Upper Primary School Association (MUPSTA) ha ka lah sngi U Blei ka la iakynduh ia u Myntri ka tnat Pule Puthi jong ka Sorkar Jylla u Rakkam A. Sangma ban pynsngew ha kaba iadei bad ka jingdawa ban kyntiew kyrdan Deficit System ia ki 844 tylli ki Adhoc Upper Primary Schools ha ka Jylla.
Ha ka jingiakren bad ki lad pathai khubor, u President jong ka MUPSTA u Bah Kenneth Shadap u la ong, “ka sorkar MDA kaba rim ka ladep pan ia ka jingtyrwa na ki 844 Adhoc Upper Primary Schools ban kyntiew sha ka kyrdan Deficit System lyngba ka shithi No. EDN/172/2006/69 dated Shillong the 7th February/2019 bad DSEL/EL/GB/Misc/16/2010/Pt.1/221 dated 18.03.2019 bad mynta ka sngi ruh ngi la iakren hi halor kane kajuh ka ishu bad u Myntri ka tnat Pule Puthi.
U Bah Shadap u la iathuh ba ka jingioh tulop shi bnai jong ki nonghikai Adhoc ka long kaba rit bha ba kin pyndap pynbiang ia la ka ing ka sem bad don ruh napdeng jong ki nonghikai ki bym kot bor wat tang ban siew bai skul ia la ki khun ynda ki ladei ka por ban bteng ia ki jingpule kiba kham shajrong.
U la bynrap, la kumba arphew snem ba ka Sorkar kam shym la ai jingiarap (non-recurring grant-in-aid) sha ki skul Adhoc kum ka maintenance grant, ka infrastructure renovations, ka jingai Uniform ia ki khynnah bad kiwei kiwei kumba la ioh jingmyntoi da ki skul SSA.
“Ngi kyntu ia u Myntri uba peit ia ka tnat Pule Puthi ba un shimkhia ha kaba iadei bad ka jingpyntreikam ia ka jingtyrwa ban kyntiew kyrdan Deficit System ia ki skul Adhoc khnang ban pyntreikam lang kumjuh ia ka jingsiew tulop katkum ka kam ba la trei,” u la bynrap.
U Bah Shadap u la pyntip ruh ba ha ka jingialang, ka seng ka la pynsngew ha u Myntri ba ki skul Adhoc ki iakynduh jingeh ruh ha kaba iadei bad ka jingthungkam khamtam ynda la shongthait bad khladnoh ki nonghikai na ka daw ba la bthah ban thung ia ki nonghikai kiba la pyndep ia ka Meghalaya Teachers Eligiblity Test (MTET) ha ki skul Adhoc. “Ki don katto katne ki skul Adhoc ki bym pat lah satia ban thung nonghikai thymmai la jan palat shi snem ha ki post kiba thylli tang na ka daw ba kito kiba la pas ia ka MTET kim shym la thep satia ia ka kam. Katba ki don pat kiba thep ia ka kam bad kiba la biang ka kyrdan pule hynrei ki dei bym pat pyndep ia ka MTET. Namarkata, ngi la kyrpad ia u Myntri ba un bishar bniah halor kane bad ban ai ka jingpynjynsur khyndiat ia ki skul Adhoc ha kaba thungkam ia ki nonghikai ki bym pat pyndep ia ka MTET.
