Shillong, Nailur 21: Ka jingbym pat aiti jong ka tnat PWD ia ka building jong ka Block Institute of Teacher’s Education (BITE) bad ka Residential School kiba don ha ka shnong Byndihati, East Jaiñtia Hills District sha ka tnat Pule Puthi ka la pynlong ia kine ki shlem pule kum ki iing jah bad ki ktem leh kam sniew jongno re jongno.
Ka Khasi Student Union (KSU) East Jaiñtia Hills District Unit lyngba ka Education Cell ha ka sngi baar ka la hiar jurip ia ki building BIET bad ia ka Residential School kiba don ha ka shnong Byndihati ban lap da la ki jong ki khmat shwa ban pynsngew sha ki bor ba dei peit jong ka tnat Pule Puthi ka Sorkar Jylla.
Ha ka sngi palei, ka seng hapoh ka jingialam jong u Publicity Secretary u samla Hame Ryngkhlem bad u Assistant Organising Secretary u Samla Chibait Rymbai ki la leit ban iakynduh ia ka Director jong ka DERT ka Kong K. R Manner ban pan jingpynshai halor ka jingbym lah ban plie noh ia ka building BITE bad ka Residential School ha ka shnong Byndihati.
Ka Seng ka la ioh jingtip ba ia ka building BITE ba la shna khnang ban pyntbit ia ki samla pule kiba thmu ban long nonghikai ka sdang naduh u snem 2012 bad la sdang ban shna ia ka ha u snem 2015. Ka seng ha ka jingjurip ka la lap ba ka building ka la shu sah khongreng haduh mynta bad kane long ka daw ba ka PWD kam pat aiti ia kane ka Building sha ka Directorate of Educational Research &Training (DERT) ban pyntreikam pura.
Kumba la ioh jingtip da ka seng, ka jingbym pat treikam ia kane ka shlem ai jinghikai ia ki nonghikai ka long na ka daw ba ka tnat PWD (Buildings) kam pat ioh ia ka Bill kaba kot kumba 3 klur tam na ka Sorkar. “Kaei kaba pynglyngngoh ia ka seng ka long ba ia kane ka Building ka ladap phra snem hynrei ka Sorkar ka dang sngap mynthi halor kane ban pyllait noh ia ka Bill,” la ong ka seng.
“Kaba sngewlyngoh pat sha kiwei ki distrik kiba don ka jaka pyntbit ai jinghikai DIET ki la ioh ka jingiarap da ki 15 klur tang na ka bynta ban maramot bad kane ka pynlyngngoh ia ka seng ba kumno ka Sorkar ka leit shiliang ia ka bhah bad ia ka East Jaintia Hills pat la ieh khunswet watla ka building ka la don phra snem pura. Kane ka pyni ba ka Sorkar kam patiaw satia ia ka bha ka miat jong ka East Jaiñtia Hills District khamtam ha kaba iadei bad ka pule puthi,” la bynrap u kyrwoh na ka Seng.
“Ka Seng ka kyntu ia ki Nongmihkhmat bad ia ka Sorkar ba kam dei ban leh shiliang. Na ka liang ka Director ka la batai ruh ba kitei ki building ki dei tang na bynta ka Block Institute of Teachers Education (BITE) bad lada ioh ia ka mang tyngka kaba pura yn sa lah ban pynkylla sha ka District Institute of Teachers Education (DIET) jong ka District,” la iathuh ka Seng.
Ka Seng ka la pyntip ruh ba ka Residential School Building ka la kylla iing jah bad shu iehshrah bad ka long kumba pynseiei kai ia ka pisa jong u paidbah. “Ngin sa leit ban iakynduh ia ki bor ba dei khmih halor ka Residential School ban pan jingpynshai halor ka jingbym lah ban pyntreikam ia ka Residential School haduh mynta,” ong ka seng.
“Ka Director ka la kular ban leit jurip ia ka jinglong jingman jong kane ka Building ha kine ki sngi ban wan bad ka la kular ruh ban phah pynkloi noh ia ka tnat PWD (Building) ban aiti noh ia kane ka Building sha ka DERT khnang ban pyntreikam noh ia ka,” la pynkut ka seng ia u kyrwoh.
