Shillong, Nailur 21 : Ka Jaiñtia National Council ba la lamkhmat da u General Secretary ha ka sngi palei ka la hiar sha ka shnong Byndihati bad ha ka shnong Umtyra ban leit jurip ia ki ar tylli ki project ba ladep shna hynrei ki bym pat plie paidbah haduh mynta mynne kiba kynthup ia ka jingshna ia ka Residential School bad ka Teacher’s Training Centre kaba lah neh da ki bun bun snem.
Ka Sorkar ka la mang pisa ban pyntrei ia ka Residential School ha u bnai Risaw, October 2015 bad la lah ruh ban shna pyndep ia ka building katkum ka por ba la buh hapoh 24 bnai bad kumjuh ruh ka Teachers training Centre la mang pisa ha u snem 2016 bad la shna pyndep katkum ka por ba la buh hynrei haduh mynta ia kine ki ar tylli ki projek ym pat shym la lah satia ban pyntreikam ne ban plie paidbah ia ki.
Ha ka jingjurip, ka seng ka lap ba ki iit bad ki jingkhang ki la pait lut bad la lap ruh ba ki jingkhang iit ki la shah lied bad ka building baroh kawei ka dap sa tang da ki bilor kyiad. La lap ruh ba kine ki ar tylli ki shlem ai jinghikai ki la kylla long pynban kum ki ktem jong ki nongleh kam sniew bad kane kan buh jingma haduh katta katta ia ki paidbah kiba iaid lynti najan kane ka jaka.
Khnang ban pynkyndit bynriew ia ka Sorkar, ka Seng ka la phah syndon da ka video ba la ringdur ia kine ki ar tylli ki jingtei khnang ba ka sorkar kan dup iohi hi da la ki jong ki khmat ia kine ki jingshah pynjulor.
