Shillong, Jylliew 19: Ka National Peoples Party (NPP) kaba iatreilang bad ka Indian National Congress (INC) ban knieh kynthet ia u lakam synshar na ka kti jong ka United Democratic Party (UDP) ha ka 19 tarik u Jylliew, 2023 ka la thaw thymmai da ka kynhun kaba la tip kum ka Khasi Hills Democratic Front ka ban ialam ia ka Executive Committee kaba thymmai ha Khasi Hills Autononomous District Council.
U MDC jong ka NPP na Sohryngkham Constituency u Bah Pyniaid Sing Syiem ha ka jingiakren bad ki lad pathai khubor u la ong, ba ka kynhun Khasi Hills Democratic Front ka don mynta 18 ngut ki MDC ba kynthup ia 12 ngut ki MDC na ka NPP bad 6 ngut na ka Congress.
Ia ka Khasi Hills Democratic Front yn khlieh da u Bah Pyniaid Sing Syiem kum u Chairman, u Bah Pynshngaiñlang N. Syiem kum u Vice Chairman, u Bah Teiborlang Pathaw kum u Secretary bad u Bah Carness Sohshang kum u Asst. Secretary.
“Katkum ka AD Rules, kumba la pynbna da u Chairman (hapoh ka Iingdorbar) ba kan don ka jingthep kyrteng na ka bynta shuki Chief Executive Member ngi ladep ban thep kyrteng, kawei ka thup la tyrwa da u Bah Bajop Pyngrope bad la kyrshan da u Bah Carnes Sohshang katba kawei pat ka thup kyrteng la tyrwa ia ka kyrteng jong nga kum u Chief Executive Member ba thymmai da u Bah Batskhem Ryntathiang bad la kyrshan da u Bah Fantin Joseph Lakadong,” la iathuh u Bah Pyniaid.
U la iathuh ba hadien ka jingbishar ia ki kot ki sla ba la thep kyrteng da u Secretary ka Legislative la shem ba ki biang lut nadong shanong.
Kumba ka long mynta, la ioh jingtip ba na ka liang jong ka UDP bad ka kynhun kim shym la thep kyrteng satia ban iakhun ia ka shuki CEM.
Haba kylli, u Bah Pyniaid u la ong ba ka thong kum ki MDC ka long ban kyntiew shwa nyngkong eh ia ka District Council.
U la kam ruh ba ka NPP ka la don ia ka jingbunpaid naduh mynno ban shimti ia ka EC kaba thymmai hapoh ka Council hynrei dei namar ka jingjynsur mynsiem jong ka NPP la ailad ia ka UDP la saw snem kynthih bad mynta pat ka la dei ka por ia ka NPP ban shimti noh tang shi snem ia ka EC ba thymmai.
Haba pynksan ia ka jingiatreilang hapdeng ka NPP bad ka Congress ha Khasi Hills Autonomouos District Council u Bah Pyniaid u la ong, “hapoh ka District Council ka long laitluid, kano kano ka kynhun kaba ialam ia ka Executive Committee ka lah ban iatreilang bad kano kano ka kynhun. Ha ka Jylla ka kyndon treikam ka don la ka jong katba ha ki District Council ki don la ka jong.”
