Shillong, Jylliew, 19: U Bah Titostarwell Chyne uba long u MDC jong ka Sohra Constituency uba la shah pynhap noh na ka shuki Chief Executive Member jong ka Khasi Hills Autononomous District Council ha ka lah Sngi U Blei u la kynthoh tyngeh ia ki MDC jong ka National Peoples Party bad ia ki MDC jong ka Indian National Congress da kaba ong ba ka jingwanrah ia ka No Confidence Motion pyrshah ia u ka dei tang ka jingrhah bor haduh ba kim salia shuh wat ia ka nongrim lajong.
Kane ka drama saiñpyrthei ha Khasi Hills Autononomous District Council ka la jia phra bnai shwa ki lai tylli ki Autononomous District Council (ADC) kin sa leit sha ka elekshon MDC ka ban sa long ha u snem 2024.
Kaei kaba la jia ha ka saiñhima sima ha Khasi Hills Autononomous District Council ka la buh ia u paidbah ha ka shaiong bad ka lyngngoh, namarba ha ka Ïingdorbar Thawain jong ka Jylla ka National Peoples Party ka la iatreilang bad ka United Democratic Party, katba ka Indian National Congress ka dei kaba shong ha ka Liang Pyrshah.
Hynrei ka jingiatreilang jong ka National Peoples Party bad ka Indian National Congress ban pynkhyllem ia ka Executive Committee ha District Council ba la ialam da ka United Democratic Party ka long kaei kaei kaba buh ia u paidbah ha ka umdum bad khamtam eh ia ka UDP.
Ha ka jingiakren bad ki lad pathai khubor hadien ba la pynkut shwa shipor ia ka Dorbar Lyiur, u Bah Titostarwell Chyne u la buh jingkylli da kaba ong, lada hapoh ka Sorkar Jylla ka Congress ka kyntait ban don bynta lang bad ka NPP namarba ka dei kaba iatreilang bad ka Bharatiya Janata Party, katba ha District Council pat kam bit BJP mo?
“Ha ka sainpyrthei kaei kaei ruh kaba lah suda ban long. Ki shim beit ba kaei kaba ki leh ka biang beit,” la kynthoh u Bah Chyne.
Haba kylli, u iathuh ba ki don ki MDC ki bym don hapoh ka Executive Committee ki la pynsngew ia ki jingeh ki jong ki ha ka jingialang jong ka United Democratic Allaince (UDA) ha kaba na ka liang jong ki MDC ruh ki la pynpaw ia ka jingsngewhun hadien ba ki la ioh jingpynshai.
“Haba la mut hi ia kaei kaei ka ban pynsniew ki mih hi ki daw,” la kynthoh u Bah Chyne.
