Shillong, Jylliew, 19: U Bah Titostarwell Chyne uba long u MDC jong ka Sohra Constituency uba la shah pynhap noh na ka shuki Chief Executive Member jong ka Khasi Hills Autononomous District Council ha ka lah Sngi U Blei u la kynnoh pyrshah ia u Chairman jong ka Council u Bah Lamphrang Blah da kaba ong ba ka rukom pyniaid ia ka dorbar ka long ka jingleh donbor.
Ha ka jingiakren bad ki lad pathai khubor, u Bah Chyne u la ong, ‘kane ka dei ka Dorbar Mang Tyngka ha kaba ka List of Bussiness ladep sam lut sha ki dkhot jong ka ÏING, nangta kaba kongsan eh ka long ban mynjur ia ka Mang Tyngka kaba ladep pynkhreh.”
“Ha kano ka nongrim la shu iaid beit sha ka No Confidence Motion,” la buh jingkylli u Bah Chyne.
“Ha ka jingshisha kum u Chairman u dei ban pyndep nyngkong eh ia ki kynta jingkylli bad ban pyndep shwa ia ka List of Bussiness bad sa wanrah ia ka No Confidence Motion hadien. Hynrei kaba pynlyngngoh ia nga ka long ba mynta ka sngi la shu leh bor namarba khlem pyniaid ia ka List of Bussiness kumba ka dei ban iaid,” u la ong.
“Kane kam dei ka Dorbar Kyrpang. Lada dei ka dorbar kyrpang na ka bynta ka No Confidence Motion ngin iakren beit tang ia kata. Hynrei ka jingpynstet ka i kumba ki tieng,” la kynthoh u Bah Chyne bad bynrap, “nga la kylli na kiba kham hashwa ia nga, ki ju ong ba ka No Confidence Motion ka wan hadien ynda ladep ka List of Bussiness.”
“Kumba ka long mynta ka buh jingeh, namarba ka la wan shwa ka elekshon ban jied ia u Chief Executive Member ba thymmai. Ynda la jied ia u CEM ba thymmai yn wanrah biang ia ka Mang Tyngka? Hato kata ka dang don lynti, ka dang don aiñ, ka dang don rukom kum kata ban pynsangeh shwa ia ka List of Bussiness bad ban wanrah shwa da ka No Confidence Motion?” la kynthoh shuh shuh u Bah Chyne.
