Shillong, Naitung, 03: Ka JETS24x7 ha ka lah sngi U Blei ka la aiti da ka jingthoh ha u Chief Executive Member (CEM) jong ka Khasi Hills Autonomous District Council (KHADC) u Bah Pyniaid Sing Syiem ban dawa ia ka Council ba kam dei shuh ban dang ai Trading License ia kiwei pat ki Taxi Aggregator da kaba pyntreikam ia ka kyndon 3A (1) (b) jong ka United Khasi Jaintia Hills District (Trading by Non-Tribals) Regulation, 1954 (As Amended).
Ha ka dorkhas ba la soi da u Managing Director u Samla Pynskhemlang W. Uriah, la ong, “ka JETS 24X7 ka dei ka thup pyniaid ia ki thuk thuk ar shaka na ka bynta ki paidbah nongleit nongwan ha ka jylla bad ka thong jong kane ka shlem ka long ban plie lad ia ka aikam aijam ia ki samla Khasi ha ka jaitbynriew ka jong ngi bad ka thong ka jong ngi ka dei ban “Kyntiew Ia la ki Jong” ha ka ktien nongwei ka dei “Uplift Our Own”.
“Ka jingseng ia ka JETS 24×7 ka long ban ai jingshakri ia ki paidbah da kaba pyniaid da ki thuk thuk lyngba ka Mobile Application App hapoh ka jylla Meghalaya bad ia ka JETS la ithuh da ka Sorkar Meghalaya bad ngi la ioh ruh ia ka license na ka Sorkar Jylla lyngba ka Transport Department,” la ong ka dorkhas.
“Lyngba kane ka shithi ngi kum ka JETS 24×7 ngi wanrah ia kane ka jingthoh ha ka miej ba donburom jong phi ia ka jingpyrshah ia ka jingai Trading License ia kino kino ki bar jylla lane ki Company kiba nabar kiba thmu ban ioh ia ka License ban pyntreikam ia ki kali kamai da kaba pyndonkam ia ka internet (Taxi Aggregator ). Ka jingkhang pyrshah ka jong ngi ka long katkum ki kyndon jong ka United Khasi Jaintia Hills District (Trading by Non-Tribals) Regulation, 1954 (As Amended), Section 3A (1) (b) kaba ong, 3A. Conditions for granting or refusing a license:(1) In granting or refusing a license under this Regulation, the License Officer or any Officer when duly authorised by the by the Executive Committee, shall take into consideration the following matters according to the circumstances of each case, namely: (b) Whether there is any tribal who carries on the same trade or is willing to carry on such trade for which the application of license is made,” la pynksan ka JETS24x7 halor ka jingdawa.
“Kum ka jylla ngi la don lypa ia ki ain ban iarap ia ngi ha ka jingialeh ha ka khaïi pateng hynrei ka shong pat ha kito kiba don ha ka bor bad ngi shaniah skhem ha ka Executive Committee bathymmai hapoh ka jingialam i Bah Pyniaid Sing Syiem ba kan ym aild ia ki ki kompeni kiba nabar namar kumba ka long mynta ngi la don ma ngi ki trai ri trai muluk ban trei ia kane ka kam kum ki Bike Taxi Aggregator ba nyngkong eh ha ka jylla Meghalaya,” la ong kane ka kynhun.
“Ngi kyrpad ruh ia ki nongshong shnong jong ka jylla ba ka por ka ladei ia ngi ba ngin sdang ban pynkylla noh ia ka saiñ pyrkhat pyrdaiñ lada ngi kwah ban iohi ba ka jylla kan roi kan par bad ba kan tyngshaiñ nangne shakhmat da kaba ngin kyrshan ia la ki jong,” bynrap ka JETS24x7. Ka JETS 24X7 ka la pynpaw ruh ba ka jingdawa ban khang pyrshah ia ka jingai Trading Licence katkum ka aiñ kan long ka jingkyrkhu ia ki samla wadkam wadjam.
