Shillong, Naitung, 03: Ka Khasi Students Union South West Khasi Hills District Unit ryngkat ka jingsynran lang jong ki nongialam na ki phra tylli ki shnong bad ki nongialam jong ki seng samla shnong kiba hap hapoh u pud u sam jong ka district ha ka lah sngi U Blei ki la pynsngew hakhmat u Myntri ka tnat Social Welfare u Bah Paul Lyngdoh halor ka jingbym larkam jong ka Anti-Narcotic Task Force (ANTF) jong ka South West Khasi Hills District namarba haduh mynta kane ka kynhun pulit kam pat ju kem satia wat tang uwei ruh u nongkhaii ne wat ia u nongdih drok hapoh kane ka district.
U President jong ka KSU-SWKHDU u Bah Forwardman Nongrem ha ka jingiakren bad ki lad pathai khubor u la ong, “ngi la pynsngew halor ka jingbym larkam jong ka Anti-Narcotic Task Force jong ka South West Khasi Hills namarba ngim pat ju iohi ba kane ka tnat Pulit kan kem wat tang uwei ruh u nongkhaii ne wat ia u nongdih drok ha Mawkyrwat. Kiba bun hi la kem da ki dorbar shnong, ki seng longkmie, ki seng samla bad ki sengbhalang.”
“Ngi la kyrpad ia u Myntri ba un pynthikna ba ka ANTF kam dei ban shu don tang ka kyrteng bad ka dei ban pyndep ia la ka kamram ba la bynshet ban tehlakam ia ka jingjyllei jong u drok ha ka thaiñ Mawkyrwat,” u la ong.
U la iathuh ruh ba ka seng bad ki phra tylli ki Dorbar Shnong ki la aiti ruh ia ka dorkhas sha ka tnat Social Welfare ban dawa ba ka Sorkar ka dei ban plie noh ia ka Rehabilitation Centre ha Mawkyrwat na ka daw ka jingjyllei jong ki samla kiba la im kyrni ha u drok ha kaba bun ki dei kiba wan na ki longing kiba duk khnang ban dup lah ban wanrah biang ia ki sha ka jingim kaba thymmai.
“Na ka liang jong u Myntri ula pynpaw ba un sa iakren ia kane ka jingdawa bad ki bor synshar ka South West Khasi Hills District,” la ong u Bah Nongrem.
“Kawei pat ka mat kaba ngi la pynsngew ka long haba ngi la tip ba u briew u la shah kem na ka jingpynthikna ba u dei uba dih drok hynrei kaba sngewsih ka long ba kam ju don ka jingbuddien (mandatory follow-up procedures) na ka bynta jong ki. Teng teng ki samla ba la shah kem ynda la lait na along ki la leh biang ia kijuh ki kam,” u la ong bad bynrap, “ngi la ai jingmut ba dei ban buddien kum ia kine ki briew khnang ban pynthikna ba kan ym jia shuh bad ba kita ki briew kin kylla noh kaba mut.”
“Ngi bna ba ka don ka District Level Committee on Drug Abuse bad ngi la iakren (bad u Myntri) ba dei ban thaw biang ia ka District Level Committee on Drug Abuse bad ba u Deputy Commissioner u dei ban long u Chairman, u District Social Welfare Officer un dei u Member Secretary bad kynthup lang ia ki samla shnong. Ngi la kyrpad ruh ia ka Sorkar ba ka dei ban pynmih ia ka jingpynbna na ka bynta ki kyndon ki ban batai ia ka kamram jong ka District Level Committee on Drug Abuse ban leh ia kata ka bynta,” la bynrap u Bah Nongrem.
“Ngi kwah ba ka Sorkar kan aibor ia ki shnong ba kin iakhun pyrshah ia ka jingkynrei jong u drok da kaba pynmih ia ka jingpynbna kum ka Village Level Committee on Drug Abuse khnang ba ki shnong kin dup lah ban pyndep ia kata ka bynta,” ula ong.
