Shillong, Jylliew, 26: Ka Khun Hynniewtrep National Awakening Movement (KHNAM) ka la dawa ia ka Sorkar Jylla ba kan thung da ka jingtohkit halor ki jingleh donbor jong ki shipai Border Security Force (BSF) katkum ka “Commissions of Inquiry Central Act” bad ruh ban weng noh ia ki shipai BSF na ki jaka paidbah bad ban pynthikna ba kin don tang ha u Zero line jong ka khappud jong ka ri.
“Ka jingjia ha Lad Umsyiem ha kaba ki shipai BSF ki la bom lathi bad pynmynsaw ia ki paidbah wat haduh ban da siat kuli sha suiñ ha ka 25 tarik u Jylliew 2023 kam dei shuh ka sien ka banyngkong ha kaba ngi la sakhi ia ka jingleh donbor jong ki BSF. Dang ha ki khyndiat sngi la don ki riew paidbah ba la shah siat iap ha ki shipai BSF. Lada ka Sorkar Jylla kan dang iai leh jem halor ka jingleh donbor jong ki shipai BSF kin dang don ki ban dang duh ei ia la ka jingim,” ong u kyrwoh ba la phah da u Working President ka KHNAM u Bah Thomas Passah.
“Ka dei ka kamram jong ka Sorkar Jylla ban peit ia ka shongsuk shongsiañ ha ka jylla bad ki shipai BSF kim lah ban tam ia u pud lane ban knieh ia ka iktiar jong ka Sorkar Jylla. Kane ka jingleh jong ki shipai BSF ka pynpaw ia ka jingbymkheiñ snep jong ki ia ka ikitar jong ki bor synshar district bad ia ka Sorkar Jylla bad ka long kaba beaiñ, bad ka Sorkar Jylla ka dei ban mudui da ka ejahar pyrshah ia ki shipai BSF katkum ka Section 147, 148, 323, 353, 427 jong ka Indian Penal Code (IPC),” la bynrap u kyrwoh.
“Ha ka 10 tarik, Naitung, 1987 ka Sorkar Jylla ka la thung da ka Inquiry Commission halor ka jingpynklumar bad ka jingbom lathi bad ka jingsiat pathar jong ki shipai BSF ha Baghmara. Te lada ka don ka jingthombor da ki shipai BSF ha ki thaiñ Khasi ruh ka Sorkar ka dei ban shim ia ki juh ki sienjam ym ban leh shilliang,” la dawa ka KHNAM.
