Shillong, Jylliew, 26: Uwei u samla ia uba la tip kyrteng kum u Jeffreywell Pohdweng u la mynsaw na ki bynta jong ka khlieh hadien ba arngut ki shipai Border Security Force (BSF) ba la kynnoh ba ki la buaid khawiang, ki la kawut lathi ia u bad ia ki lai ngut ki paralok jong u ha ka miet sngi U Blei ka 25 tarik u Jylliew, 2023 ha Lad Umsyiem. Ia ki lai ngut la tip kyrteng kum u Bajop Surong, uba la 25 snem ka rta, u Wanborlang Sumer uba la 18 snem ka rta bad u Charly Mukhim uba la 14 snem ka rta.
Ka kynhun lum khubor jong ka Batesi TV tang shu ioh jingtip halor kane ka jingjia ka la hiar sha ka shnong Umsyiem ban tih bniah ia ka daw kaba la pynlong ia ki shipai BSF ban bom dusmon ia ki nongleit nongwan kiba thmu ban leit sha Dawki.
Katkum ka jingiathuh jong kine ki saw ngut, ki shipai BSF ki la pynthut ia ki briew kiba thmu ban leit sha Dawki bad dei na kane ka daw ba ka la mih ka jingiahylla jong ki riew paidbah ia ki BSF. Kham katto katne por, ki paidbah ki la nang ialum lymbung ha surok bad tur sha ka ktem sah jong ki shipai BSF kaba don hajan Umsyiem.
Dei ha kum kane ka por ba ki shipai BSF ki la pyntieng ia ki paidbah da kaba siat bun kuli sha suin. La iathuh ruh ba ki paidbah kiba dap da ka jingbitar ia ka jingpynibor jong ki shipai BSF ia ki trai shnong ki la kawang da ki maw ia ka ktem jong ki shipai BSF.
Ka Khasi Student Union hapoh ka jingialam jong u President u samla Lambokstarwell Marngar tang shu ioh jingtip halor kane ka jingjia ki la hiar mar mar ban iakynduh ia ki saw ngut ki samla kiba la shah kawut lathi ha ki shipai BSF.
