Shillong, K’lyngkot, 06: Ka ophis jong u Chief Electoral Officer (CE) ka Election Department ka la pyntip ba ïa ka Final Rolls kaba ïadei bad ka jingpynlong ïa ka Special Summary Revision na ka bynta ki 60 tylli ki Assembly Constituency ladep ban pyllait paidbah ha ka 5 tarik, mynta u bnai.
Katkum ka jingpyntip jong u Chief Electoral Officer Dr. BDR Tiwari, ka jingdon jong ki nongthep vote ha Meghalaya katkum ka Final Rolls ka long 22,17,100 lak ngut. Kumta ka jingkiew jong ki nongthep vote kiba thymmai ka long 30,949 hajar ngut haba ïanujor bad ka jingdon jong ki 21,86,151 ngut ki nongthep vote ha ka por ba la pynmih ïa ka Draft Rolls ha ka 27 tarik, Risaw, 2023.
