Shillong, K’lyngkot, 06: Ka DPK Multi-Ventures kan sa pynlong ïa ka tamasa tlang harud wah Umngi ïa kaba la tip kum ka 1st Umngi Winter Beach Festival 2024 ha Dangar Mawsynram, East Khasi Hills District.
Ïa kane ka tamasa Umngi Winter Beach Festival 2024 yn sa pynlong ban kyntiew ïa ka kam jngohkai pyrthei bad ban plie ïa ki lad aikam aijam ïa ki samla.
U Secretary jong ka DPK Multi-Ventures Bah James Paul Ïawphniaw ha ka jingïakren bad ki lad pathai khubor u la pyntip ba ïa kane ka tamasa yn sa pynlong ar sngi kynthih, kata, ha ka 12 tarik bad 13 tarik mynta u bnai
U la ïathuh ba ka jingthmu ban pynlong ïa kane ka tamasa ka long ban pynpaw pyrthei ïa ka jingithiang bad ka jingitynnat jong ka wah Umngi kaba ïasyriem bad ka Beach ha Goa.
U la pyntip ba ha kane ka tamasa kan plie lad ïa ki samla ka thaiñ ba kin pynpaw pyrthei ïa ki sap ba ki don, ban pynriew spah ïa ka lariti bad lyngba kane ka tamasa kan khring shuh shuh ïa ki nong jngohkai pyrthei la ka long na ka jylla bad na shabar ka jylla.
U Bah Armstrong L Thongni uba dei uwei na ki nongïalam jong kane ka kynhun haba bynrap lang u la ïathuh ba ha kane ka tamasa kin don shibun ki jingpynbyrngia ki ban khring ïa ki paidbah naduh ka tem ka put, ka rwai ka siaw na ki nongrwai ba paw ka Jylla kynthup ka kynhun Snow White, Gracyl Ropmay, DJ DBRYN nalor kiwei kiwei.
U la pyntip ruh ba yn pynlong ruh ia ka rynsan Miss Beach Festival Contest kaba kit ïa ka khusnam da ka song pisa kaba T. 40, 000 hajar ïa kaba wan nyngkong, T. 25,000 ïa kaba wan baar bad bad T. 15,000 ïa kaba wan balai.
La khmih lynti ruh ba ka jingwan poi jong ki paidbah kiba ïashim bynta ha ka tamasa kan ym duna ïa ki hajar ngut ha ka shi sngi.
