Shillong, Rymphang, 17: U President ka Hynñiewtrep Achik National Movement (HANM) Bah Lamphrang Kharbani u la kren bynniaw halor ka jingduna shaba palat ki trai ri trai muluk ka jylla Meghalaya ki ban pas ia ka IAS, IPS, IFS bad kiwei kiwei ki kyrdan kiba heh namar ka jingduh kabu na ka daw ka jingbym pat pynrung ia ka ktien Khasi ha ka Khyrnit Baphra jong ka riti synshar ka Ri India.
Ia kane, u Bah Lamphrang u la pynpaw haba kren ha ka jingpynskhem ia ki nongkitkam ba pura jong ka Hynniewtrep Achik National Movement (HANM) Nongpoh Circle ha ka sngi Saitjaiñ.
“Tang shu wan ka Sorkar bathymmai ha Delhi, ka seng ka long kaba la pynkhreh ban pynurlong ia ka jingdawa na ka Sorkar ba kan pynrung ia ka ktien Khasi ha ka Khyrnit Baphra jong ka Riti Synshar ka Ri India,” u la ong.
Ki nongkitkam ba thymmai jong ka HANM, Nongpoh Circle ki kynthup ïa u President u Bah Donroy Kshiar, Vice president Bah Khrawpyrkhat Thongni, General Secretary Bah Wanteibor Makri, Assisant Secretary Bah Honly Navin Marbaniang, Finance Secretary Bah Aiborlang Suting bad kiwei kiwei.Ha ka jingpynskhem ia ki nongïalam ba thymmai ka Circle kaba la long ha ïingdorbar, Sajer, Nongpoh la sakhi lang da u President ka Ribhoi District Unit Bah Ajit Makri bad kiwei kiwei ki nongïalam bad ki dkhot jong ka seng.
