Shillong, Rymphang 17: Ki rangialehkai phutbol jong ka jylla Meghalaya kin sa mih na la iing lashai ka sngi U Blei ban leit iashim bynta ha ka lympung ialehkai phutbol jong ka 77th Santosh Trophy ka ban long ha nongbah Itanagar, Arunachal Pradesh.
Shwa ba kane ka kynhun kan mih na la iing, la pynlong ia ka jingialang kitbok kitrwiang ha kaba la don lang u Secretary jong ka Meghalaya Football Association u bah Sunesh Syiem, ki dkhot jong ka Senior Cell, u Coah lem bad ki rang ialehkai.
Ha kane ka kynti, kin don 12 tylli ki kynhun ialehkai na ki jylla ki ban iaknieh ia ka nam lahduh ha ka 77th Santosh Trophy bad ka Meghalaya kaba la ngat ha ka Group-A kaba kynthup ia ka Arunachal Pradesh, Goa, Assam, Services, bad ka Kerala.
Ka Meghalaya kan iakhun nyngkong eh ia ka Services ha ka 21 tarik, Rymphang, bud pat sa ka jingiakhun pyrshah ia ka Assam ha ka 23 tarik Rymphang, ia ka Kerela ha ka 25 tarik Rympahng, ia ka Goa ha ka 28 tarik Rymphang bad ia ka Arunachal Pradesh ha ka 1 tarik Lber, 2024.
Kum ban shu pynkynmaw hangne, ba kane ka kynhun ialehkai na ka jylla Meghalaya kaba la ioh rung sha ka phainal jong ka Santosh Trophy kaba la long ha u snem 2023.
Ha ka jingiakren bad u Bah Sunesh u pynpaw ba 80 na ka 100 ki rangialekai ki dei kiba la don bynta bad ka kynhun kaba la rung shaduh ka phainal jong kane ka lympung ialehkai ha u snem ba ladep bad nalor kata, la pynrung shuh shuh sa ia ki katto katne ki samla ialehkai ha kane ka kynhun.
Ki rangialehkai ka Meghalaya ki long u Siwel Rymbai, Daraphun Talang, Lionel Daryl Rymmei kiba dei ki Goalkeeper, Wanboklang Lyngkhoi, Donborlang Nongkynrih, Banskhemlang Mawlong, Brolington Warlarpih, Over Kindness L. Mawnai, Dawan Plielad Myrchiang, Lukas Syngkli kiba dei ki Defender, u Baby Sunday Marngar, Kitboklang Pale, Nekilson Bina, Damonlang Pathaw, Dameki Khongstia, Dawanchaw Carlos Challam, Robert Khongjoh, Baiaikara Swer kum ki Midfielder, u Sheen Stevenson Sohktung, Nelson Rymbai, Shaiborlang Kharpan, Chesterpaul Lyngdoh kum ki Forward.Ki Coach ki kynthup ia u Bah Khlaiñpyrkhat Syiemlieh kum u Head Coach, u Playerson Syiemlieh, Asst. Coach, Freddy Kharpran Mananger, Lucky Mary Marbaniang Physiotherapist.
