Shillong, Nailar, 22: Ka Employment Monitoring Cell jong ka Khasi Students’ Union (KSU) ha ka sngi Palei ka la leit ban aiti da ka dorkhas sha baroh 58 ngut ki MLA bad sha u Myntri Rangbah ka jylla u Conrad Kongkal Sangma kaba don 20 tylli ki mat dawa kiba ka seng ka la angnud ban dei ban wanrah noh ïa ka jingtreikam kaba thymmai bad kaba khuid hapoh ka Meghalaya Public Service Commission (MPSC).
Ha ka jingïakren bad ki lad pathai khubor ha Shillong Press Club, u Chairman jong ka Employment Monitoring Cell ka KSU u samla Reuben Najiar u la kynnoh ba la bun tylli ki snem ki jingtreikam jong ka MPSC ki la long kiba dkoh nalor ba ka don ka jingbym khuid ha ka rukom thungkam thungjam.
U la ïathuh ba ka jingaiti ïa ka dorkhas ha ki 59 ngut ki MLA ka long ba kin pule bniah ïa ki jingdawa jong ka seng ba kin dup ïathir ïatai ha ka Dorbar Synrai jong ka Ingdorbar Thawaiñ ka Jylla ka ban sa long ha ka 23 tarik mynta u bnai.
U samla Reuben u la ïathuh ruh ba ha ka dorkhas, ka seng ka dawa ba dei ban thung Chairman ha ka MPSC da ki briew kiba la don ka kyrdan pule hynrei ym da ki briew kiba don ka jingïajan bad kino kino ki seng saiñpyrthei, ban pynduh noh ïa ka Personal Interview ha ka post Grade B,C bad D bad ba dei ruh ban pyndonkam da ka Camera haba leh ïa ki Personal Interview na ka bynta ki post ha Grade-A.
U la ong ba ka seng ka la dawa ruh ba ka MPSC ka dei ban pynbna paidbah ïa ki marks jong ki nongïakhun eksamin nalor kiwei kiwei pat ki mat jingdawa.
