Shillong, K’lyngkot 19: Ki dkhot bad ki nongïalam jong ka Hynñiewtrep Youths Council (HYC) ha ka sngi Thohdieng ki la mih kyndit sha surok ban rah da ki plakad hajan ka Civil Hospital, Shillong ryngkat ka jingpyrta shla ban pynrem jur ia ka Sorkar Pdeng bad ia u Myntri ka tnat Kam Pohing u Amit Shah halor ka jingmynthi ban ai jingmynjur ban pyntreikam ia ka Inner Line Permit (ILP) ha kane ka jylla Meghalaya.
U Amit Shah u la wan sha nongbah Shillong ha ka sngi Balang ban iashim bynta ha ka jingialangbah jong ka North Eastern Council (NEC) kaba la long ha State Convention Center, Shillong.
Ki Pulit ki la pynkhlaiñ ia ka jingpahara khnang ban tem ia kino kino ki jingkulmar kiba lah ban mih ha kane ka jingiakhih kyndit jong ki dkhot ka HYC kiba la shong kyllaiñ myngngor hapdeng surok.
Katba ki dkhot jong ka HYC ki dang shong kyllaiñ mynngor hapdeng surok ki Majistor bad ki bor Pulit ki la wan poi ban beh da ka bor ia ki dkhot ka seng bad byrngem ruh ban thep hapoh Bos ban kit sha madan Malki. Shipor ka la mih ka thma ktien hapdeng kine ki arliang mamla hadien ba ki nongialam ka HYC ki la pyneh beit triang ban kynriah nadpeng surok kat haduh ba la wanrah ka jingdheng kali kaba jur shipor kaba la pynthud ia ki kali kiba wan na ka thaiñ Civil bad kiba thmu ban leit sha IGP, Khyndai Lad ter ter sha Motphran.
Kham katto katne por, ki dkhot bad ki nongialam jong ka HYC ki la kynriah noh ban pynlong ia ka jingiakhih hakhmat u durmot jong u Kiang Nangbah.
Shwa ban iapra na kane ka jaka, ki dkhot ka HYC ki la pynher da ki balloon rong iong ba la teh lang bad ka jingthoh, “No ILP, No Rest.”
