Tura, K’lyngkot 19 : Kawei na ki jingialehkai kaba lehse kaba ym juh bna koit ba kan paw ne ban ialehkai pura ia ka, pynban dei ha ka lympung kaba mynta jong ka Meghalaya Games kaba 5 kaba la long ha sorbah Tura, ka Volleyball, lehse ka dei kawei na ki jingialehkai kaba ki samla na kane ka jylla khamtam lei lei ki shynrang ki don bha ia katta ka sap ba kin ialehkai.
Kumba ka kyntien ki riewtymmen ka ong “baroh u briew ba stad mano ba lah ban len, lada khlem da plie ka lad da kumno un lait ban kren”.
Da kumta haba phai sha kane kawei na ki jingialehkai kaba la long ha kawei ka madan shyiap ba don ha kut jong ka shlem pule ka Tura Law College, la shem bad iohi ba ki sap ialehkai ba nylla ki khun samla, khamtam lei lei ha ka liang ki khynnah shyrang, ka dak jong ka jingkyrmen ka don ia ka jylla ha ka liang jong ka volleyball.
Haba phai sha ki jingiakhun jong ki semifinal kiba la long mynta ka Thohdieng jong ka taiew, ki rang ialehkai jong ka West Garo Hills ki la lah ba kin pynliem noh ia ka ia ka South Garo Hills da 25 – 22, 22 – 25,25 – 23, Set 4 : 25 -16).
Katba ha ka jingiakhun ia ka semifinal kaba ar pat ka kynhun ialehkai ka South West Khasi Hills ka la lah ba kan pynliem noh ia ka North Garo Hills da 25-21, 17-25, 23-25, 25-17, 17-15,
Lada yn ia phai pat sha ka jingiakhun hapdeng ki kynthei, ki thei ialehkai jong ka South West Khasi Hills District ki la lah ban pynliem noh ia ka East Khasi Hills da 25 – 14, 20 – 25, 25 – 18, 25 – 18.
Ha ka jingiakhun ia ka semifinal kaba ar pat, ki thei ialehkai jong ka South West Garo Hills District ki la lah ban pynliem noh ia ka West Garo Hills District da 25 – 09, 25 – 15, 25 – 23.
Hadien kane, ka la don pat ka jingpyniakhun ia ka kyrdan kaba lai (bronze medal match) kaba na ka liang ki kynthei, ka kynhun ka East Khasi Hills ki la lah ban pynliem noh ia ka West Garo Hills District da 25 – 14, 25 – 11, 25 – 20.
Katba ha ka jingialehkai ki shynrang ka jingiakhun ka dang bteng ban jam shakhmat.
