Shillong, Nohprah, 13: U Myntri Rangbah ka Jylla u Conrad Kongkal Sangma ha ka sngi Balang u la ong ba ka Sorkar Jylla ka dang bishar bniah halor ka Meghalaya Residents, Safety and Security (Amendment) Bill (MRSSAB), 2020, hadien la pynphai biang da ka Ministry of Home Affairs (MHA) ka Sorkar India.
Ha ka jingïakren bad ki lad pathai khubor, u Sangma u la ong, “ka MRSSAB ka dei kawei pat ka lad ha ka jaka jong ka Inner Line Permit ïa kaba ngi la khynñiat bad mynjur hapoh ka Ingdorbar Thawaiñ bad ngim shym pat ïoh ïa ka jingmynjur na u Lat hynrei la phah pynban sha Delhi bad sha u President ka ri ban ïoh jingmynjur bad dei halor kane ka daw ba ka Sorkar India ka la phah da ka jingthoh sha ka Sorkar Meghalaya bad ong ba phi dei ban khmih bniah ïa ka namarba ki don katto katne ki Section ki bym ïahap bad ki katto katne ki kyndon.”
“Dei halor kane mynta ngi la hap ban shong bishar biang (ïa ka MRSSAB) bad ngi la ïakren ruh ïa ki kynhun bapher bapher, ïa ka kynhun ki stad aiñ bad ïa u Advocate General khnang ban dup lah ban ïaid shakhmat. Ka long kaba kyllaiñ namarba ki aiñ ka Sorkar Pdeng, ki aiñ ka Sorkar Jylla ki dei kiba ngi hap ban da bishar bniah shwa ban shim rai halor kane bad ka kam ka dang ïaid mynta shakhmat bad ngin sa nang ïai buddien,” u la ong.
U la ïathuh ba ka jingïalang bad ka kynhun bapher bapher shen kan sa long ha u snem thymmai.
Haba kylli, u Sangma u la ong, “haoid ka dei ka jingong jong phi ba ka ishu wan rung kyrthep ki briew kiba nabar bad khlempep ki don bun tylli ki kam bad ki sienjam ba la leh ha ki bynta bapher bapher. Namarkata, kam dei satia ba kam don eiei kaba ym shym la leh hynrei ka Sorkar ka la leh la ka jong ka kamram, la ka long ha ka ka jingtalasi ha Infiltration Check Gate, la la long ha ki tnat treikam bapher bapher ban wad ïa kine ki briew bad ban kumno ban pynphai biang sha ka jaka ba ki wan.”
U la ong ruh ba kine ki dei ki kam kiba la ïaid shakhmat tangba ka ïapher bha bad ka ILP bad MRSSA namarba ka jingthmu jong kine ki ar tylli ki aiñ, ka long ban don ïa ka khyrdop talasi ïa manla uwei pa uwei u briew uba wan rung shapoh ka jylla.
“Katkum ka ILP, u briew u hap ban da ïoh jingbit shwa ban rung sha ka jylla.
Namarkata, ka la mih ka jingdawa kaba jur na ki paidbah bad hadien kata la mynjur ïa ka Resolution ba ka dei ban don ka ILP ha ka jylla Meghalaya bad ngi la kyrpad ïa ka Sorkar India hynrei ka Sorkar India kam shym la ai dak eiei ruh em halor kane,” la bynrap u Sangma.
U la bynrap ba ka Sorkar Meghalaya haduh mynta ka dang ap ïa ka jingmynjur jong ka Sorkar Pdeng bad haduh mynta ka Sorkar Jylla ka dang ïai pynkynmaw ïa ka Sorkar Pdeng ban eksamin bad ban shim rai halor ka Resolution jong ka ILP.
