Shillong, Nohprah, 13: U Myntri Rangbah ka Jylla u Conrad Kongkal Sangma ha ka sngi Balang u la ong ba dei tang ka Kashari kaba lah ban ai jamin ïa ki dkhot ba la shahkem jong ka North East Petroleum Mazdoor Union (NEPMU) hynrei ym da ka Sorkar.
Ha ka jingïakren bad ki lad pathai khubor, u Sangma u la ong, “ngi la ïakren lut ïa baroh halor kane bad ka kam ka dang don ha ka Kashari. Ki la kyrpad ban ai jamin hynrei ïa ka jamin dei tang ka Kashari kaba lah ban ai hynrei ym da ka Sorkar. Ka kam ka dang ïaid mynta shakhmat.”
“Hynrei ha kum kane ka por, katto katne ki nongñiah Trok kim hun satia bad dei halor kane la pynlong ïa ka jingïathir ïatai kaba dang ïaid mynta shakhmat. Ka Sorkar ka la trei shitom ban pynthikna ba ki paidbah kim dei ban mad jingeh,” u la bynrap.
Da kaba kyrpad ïa ki paidbah ba kin ym khuslai jingmut, u Myntri Rangbah u la ong, “ha kum kane ka por, nga kwah ban kyrpad ïa ki paidbah ba kim dei ban khih khuslai haba kum kine ki jingjia ki wan namarba ka Sorkar kan sa pyntip sha ki paidbah nongshong shnong bad wat shah ba ngin shah ïalam bakla ha ki hamsaïa. Ngim dei ban khuslai jingmut namarba kam don eiei ka ban pynkhuslai.”
“Haoid, ki jingeh ki don hynrei ka jingïakren ka dang ïaid bad ngi la pyrshang ban weng ïa kane ka jingeh bad kam don satia kano kano ka jingeh kaba ïadei bad ka jingwanrah ïa ka umphniang petrol bad diesel sha ka Jylla. Nga kwah ban kyrpad ïa ki paidbah ba kim dei ban khuslai jingmut. Lada ka don kano kano ka jingjia, ngin sa ïoh jingtip hynrei ïa mynta ngi dang lah ban tehlalam,” la kular u Myntri Rangbah.
