Shillong, Risaw, 13: Hadien lai snem duna ba u Myntri Robert Feller Kharbuki na Lawmei uba mihkhmat sha ka Hima Mylliem u la khlad noh na kane ka sla pythei, ka kur Kharbuki ha ka 13 tarik u Risaw, 2023 ka la ioh ia u Myntri uba thymmai uba la tip kyrteng kum u Bah Zubestar Kharbuki u ban mih bujli na ka bynta ka kur.
Kum ban shu pynkynmaw ba ka Kur Kharbuki, ha ka Dorbar Kur kaba la long ha ka shnong Lawmei ha ka 19 tarik, Nailar 2023, da kawei ka jingmut bad da ka jingiahun lang baroh kiba la wan sha ka Dorbar, ka la jied ia u Bah Zubestar Kharbuki ba un mih pateng kum u Myntri jong ka Kur Kharbuki, Lawmei.
Da ka jingsakhi lang jong ka Kur Kharbuki na Lawmei, ha ka sngi Thohdieng ka ophis jong u Syiem ka Hima Mylliem ka la pynkhamti da ka Sanad kum ka jingpynskhem ia u Bah Zubestar Kharbuki kum u Myntri jong ka Kur Kharbuki, Lawmei bad ban ithuh noh ia u kum u Myntri bathymmai jong ka Kur Kharbuki ban mihkhmat sha ka Hima.
Ka Hima Mylliem ka la ai jingithuh ia u Myntri Zubestar Kharbuki katkum ka riti ka dustur bad ruh katkum ki kyndon ka aiñ, “The Khasi Hills Autonomous District (Appointment and Succession of Syiem, Deputy Syiem, Electors and Rangbah Shnong of Mylliem Syiemship) Act, 2007 bad ka Admistration of Mylliem Syiemship Rule, 2015.
“Phi dei ban bud bad ban kohnguh ia ki hukum bad ki jingbthah na kane ka Dorbar u Syiem ka Hima Mylliem ha baroh ki kam katkum ka riti, ka dustur bad ka Aiñ kiba la mih ne ban dang iai pynmih n aka por sha ka por kiba iadei bad ka Hima Mylliem,” ong ka Sanad ba la pule da u Syiem jong ka Hima Mylliem.
“Phi dei ruh ban iatreilang bad ka Dorbar u Syiem Hima Mylliem ha baroh ki kam. Ladas hem ba phi pynkheiñ ia kitei ki kyndon u Syiem ka Hima Mylliem bad ka Dorbar u don ka hok ban weng noh ne pynsangeh ia phi na ka jinglong Myntri,” la pynkynmaw shuh shuh u Syiem ha ka Sanad bad bynrap, “borabor phin ri ia ka iktiar ba la pynkuup ha phi da ka burom na ka bynta ialade bad ia ki kur ki jait lajong.”
Na ka liang jong u Rangbah Kur bad u Secretary jong ka Kur Kharbuki u Bah Highborn Kharbuki, haba pynithuh ia u Bah Zubestar Kharbuki hakhmat u Syiem jong ka Hima Mylliem ki la pynpaw hadien ka jingkhlad noh jong u Myntri Robert Kharbuki kam long kaba suk satia ban ioh ia u Myntri uba thymmai hynrei da kawei ka sur ka Dorbar kaba la long dang shen ka la jied ia u Bah Zubestar Kharbuki kum u Myntri ba thymmai jong ka Kur.
U Paiem Ainam Manik Syiem hadien ba la pynkhamti ia ka sanad ha u Bah Zubestar Kharbuki haba kren ha kane jingialang u la kyntu ia u Myntri Kharbuki ba um dei ban leh klet ia ka kur bad ia ki kyndon pyniaid ia ka synshar ka khadar hynrei u dei ban burom bad ban kohnguh ia ki hukum bad ki jingbthah kaba mih na ka dorbar jong u syiem ka Hima Mylliem.
U Myntri Zubestar Kharbuki, ha ka jingiakren bad ki nongthoh khubor u la ong ba un ai ka jingiatrei lang sha baroh ki Bakhraw Batri jong ka Hima bad khamtam eh bad u Syiem jong ka Hima Mylliem.
