Shillong, Lber, 26: U President jong ka Hill State People’s Democratic Party (HSPDP) Bah KP Pangniang ha ka sngi Baar ula ong ba ïa ka Regional Democratic Alliance (RDA) la thaw hapoh ka jingïalam jong u President barim ka UDP (L) Dr Donkupar Roy bad u President barim ka HSPDP u Ardent M. Basaïawmoit, uba ïalam mynta ïa ka VPP ka party kaba thymmai ha ka jylla.
“Phi dei ban kylli ïa u Bah Ardent halor ka nongrim ba la pynkha ïa ka RDA ha u snem 2017,” ong u Bah Pangniang haba ïakren bad ki lad pathai khubor.
U la ong, ka RDA ka kwah ban wanrah ïa ka jingïatylli hapdeng ki sengsaiñ pyrthei riewlum bad ban ïoh ïa ka jingkyrshan na ki paidbah ka jylla. “Da kaba buh jingmut ïa kane, ngi la rai ban pynkhlaiñ shuh shuh ïa ka RDA,” u la bynrap.
Haba pynpaw ba ki paidbah ka jylla ruh ki shaniah ïa ka UDP bad ïa ka HSPDP, u Bah Pangniang u la ong, “baroh ar tylli ki party ki don ïa ka jingïoh vote kaba palat 3.35 lak bad ngi ngeit ba kane ka pyni shisha ba ki paidbah ki kwah ïa ngi ba ngin ïatreilang.”
“Ngi kyrmen ruh ba ki paidbah kin dang ïai bteng ban kyrshan ïa ka RDA (ha ka elekshon Lok Sabha) kumba ki la leh ha u snem 2023,” ula bynrap.
Shwa kane, u President ka UDP Bah Metbah Lyngdoh u la ong ba ka UDP bad ka HSPDP kiba ïatreilang hapoh ka lama jong ka RDA ki don ka jingngeit skhem ban jop na Shillong Seat.
“Ngin dang ïatrei shitom shuh shuh ha ki taiew ban sa wan shwa ka sngi thep vote. Ngi long kawei bad ka HSPDP bad ngi don ha kajuh ka rynsan ha kaba ngi ïatreilang na ka bynta ka bha ka miat jong ki paidbah bad na ka bynta ka jaidbynriew,” u la ong.
U la ong ruh ba ki ar tylli ki party ki ïasam ïa kajuh ka jingkitkhlieh ha ki rynsan ïalap elekshon na ka bynta u kyrtong ka RDA Bah Robert June Kharjahrin.
Haba kylli, u Bah Lyngdoh u ong, ym don ba lah ban kynto ïa ka RDA ba kan sangeh noh ban ïakhun ïa ka elekshon MP.
“Ym don mano mano ruh ba lah ban ong ïa ngi weng noh na ka jingïakhun. Kano kano ka rai kaba ngi shim, ka dei beit na ka bynta ka bha ka miat jong iwei pa iwei,” u la bynrap.
