Shillong, Nohprah, 09: Ka Khasi Students Union (KSU) Khliehriat Town Unit bad ka Ladrymbai Unit ha ka sngi Thohdieng ki la leit ïa kynduh bad u Additional Superintendent of Police (ASP) jong ka East Jaiñtia Hills u Bah Banraplang Jyrwa uba khmih ïa ka tnat Pynïaid Kali (Traffic) halor ka jingjur shaba palat ka jingdheng kali ha iew Ladrymbai bad iew Khliehriat naduh ka por mynstep, mynsngi haduh jan miet kaba la jia manla ka sngi.
Kum ban shu pynkynmaw ba ka KSU ha kine ki kyndiat bnai ba ladep ka la aiti da ka dorkhas bad pynsgew sha u Myntri ka tnat Kam Pohiiing Bah Prestone Tynsong ban wanrah da ka Traffic Branch hapoh ka District khnang ba yn dup lah ban tehlakam bha ïa ka rukom pynïaid kali ha ka District, hynrei kaba sngewsih haduh mynta ka Sorkar ka khlem leh eiei halor kane ka jingdawa jong ka seng.
Ka seng lyngba u General Secretary jong ka Ladrymbai Unit u samla Chanky Shylla bad u President jong ka Khliehriat town Unit u samla Kyrshan Dkhar ki la ai jingmut ïa ka tnad Traffic Cell ban tehlakam ïa ka jingjur palat ka dheng kali ha ka district bad ha iew Ladrymbai da kaba pynmih ïa ka Advisory lane Hukum ka ban pynïaid noh ïa ki trok thylli na ka surok Bypass Ladrymbai PWD khnang lait na ka dheng kali ba ha ka por mynsngi ha Ladrymbai bad Khliehriat kaba ktah shisha ïa ka ïaid ka ieng ki paidbah bad ïa ki khynnah skul bad khamtam ïa ki kali Fire Brigade bad ambulance
Ïa kane ka seng ka la ai jingmut ban leh shwa kum ka jing pyrshang bad ban peit kumno ka seisoh neem.
Ka seng ka ïaiban ba ka Traffic Branch ka dei ban don noh hapoh ka District khnang ba ki paidbah ka thaiñ kin nym shah ktah.
