Shillong, Jylliew 16 : Ka jingther jong u lapbah bad ka jingbeh kyrthep jong ka eriong eriong ha kine ki 9 sngi ba la leit noh ka la wanrah ia ka jingiap ei jong uwei u rangbah ha Ribhoi District bad haduh 186 tylli ki ing ki la shah pynjulor.
Ia kane la iathuh da ka Executive Director jong ka State Disaster Management Authority ka Kong Matsiewdor War Nongbri haba ai jingkhein halor ka jingshah ktah jong ki 79 tylli ki shnong na ka jingther jong u lapbah lapsan ha kylleng ka jylla Meghalaya baroh kawei. Ka Kong Matsiewdor ka la iathuh ruh ba ha kine ki jingjia, haduh 2777 hajar ngut ki briew ki la shah ktah na ki jingshlei um, ki jingtwa khyndew. Naduh ka 8 tarik haduh ka 16 tarik u Jylliew, 2023, la ioh jingkhein ba ki don haduh 3 tylli ki jingri jingdub kiba la iap ha kine ki jingwan lynshop jong ki bor ka mariang.
Ha kine ki 9 sngi, ki district kiba la mad ha ka jingwan lynshop jong ki bor ka mariang ki long ka North Garo Hills, ka West Khasi Hills, ka East Khasi Hills, ka South West Khasi Hills, ka East Jaintia Hills, ka West Garo Hills, ka South West Garo Hills bad ka Ri Bhoi District.
Ka la iathuh ruh lyngba ka Common Alerting Protocol (CAP) la pyntip sha ki paidbah lyngba ki SMS na ki Mobile Company khnang ba kin dup husiar lada jia ka jingther u lapbah uba jur kumba ka IMD ka ladep ai jingmaham lypa ba kan don jingther jong u lapbah uba jur ha East Khasi Hills, West Khasi Hills bad ha Jaintia Hills.
Katkum ka jingiathuh jong ka Kong Matsiewdor, kawei ka ing ka la pluh ha West Khasi Hills, kawei ka jingshah pom leilieh bad kiwei pat ki dei ki jingshah pynjulor na ka jingbeh kyrthep ka eriong bad ka jingtwa khyndew.
Ka jingtwa khyndew kaba jur ka la jia ha Sonapur tunnel ha surokbah NH-6 kaba hap hapoh ka Lumshnong C&RD Block bad ha riat Rngain ha surokbah Shillong Dawki NH-40.
“Katkum ka jingmaham jong ka IMD, kan don ka jingther jong u lapbah uba jur ha 17 tarik bad ha ka 18 tarik ha South Garo Hills, East Garo Hills, South West Khasi Hills, West Khasi Hills, East Khasi Hills, West Jaintia Hills bad ha East Jaintia Hills. Ia kine ki jingmaham ladep pyntip lypa bad ngi la pynkhreh lypa ia ki lad jingiada,” la ong ka Kong Matsiewdor.
Shuh shuh ka la pyntip ba ka SMDA ka la shong jingialang bad ki ophisar jong ka Geological Survey of India ban pynthikna ba yn dup lah ban iada lypa lada jia kano kano ka jingtwa khyndew. “Ka GSI kan hap ban tih bniah bad kan sa lum jingtip ia ki jaka kiba ju jia khah khah ka jingtwa khyndew,” ka la bynrap.
Ha kaba iadei bad ki dieng kiba la rim ha kylleng ka jylla, ka Kong Matsiewdor ka la iathuh ba ki Deputy Commissioner ki la peitngor bha bad ki la pyntip ruh ba kin sa ai jingtip kumno ban leh.
Ka la kyrpad ruh ia ki paidbah ba kin thep (download) ia ka Sachet App ban ioh jingtip marmar halor kino kino ki jingmaham kiba iadei bad ka jinglong jingman jong ka mariang hapoh ka jylla.
