Shillong, Jylliew, 16: Kakynhun ialehkai jong ka Ribhoi District ha ka liang jong ki shynrang ka la ioh khur ia ka nam lahduh da kaba pynliem noh ia ka kynhun ialehkai na West Jaintia Hills District da 4 -0 kol ha ka lympung ialehkai phutbol jong ki khynnah skul ia kaba la tip kum ka Chief Minister’s State Level Under-12 Years Football Tournament kaba la long ha madan ialehkai jong ka Sports Authority of India, STC Shillong.
Ia kane ka lympung ialehkai phutbol jong ki khynnah skul ba la pynlong da ka Director of Sports and Youth Affairs, ka Sorkar Jylla la pynkut noh ha ka Sngi Thohdieng ha kaba la pynhap pyrda da ka Deputy Commissioner jong ka East Khasi Hills District ka Kong Rosetta M. Kurbah kaba la long kum ka Kongsan
Ha ka jingiakhun ha ka liang jong ki kynthei, ka kynhun ialehkai jong ka West Khasi Hills District ka la ioh rah ia ka nam lahduh da kaba pynliem noh ia ka kynhun ialehkai jong ka East Jaintia Hills District da 4- 3 kol lyngba ka jingiashut tie breaker.
Ha kane ka sngi la sam ia ka khusnam Best Goal Keeper ha ka liang jong ki shynrang ba la iohrah da u Subhrata Rabha na North Garo Hills katba ia ka nam Best Player la ioh rah da u Shamiki Myrchiang na West Jaintia Hills.
Ia ka nam Best Goal Keeper ha ka liang ki kynthei la iohrah da ka Larishisha Dkhar na East Jaiñtia Hills District katba ia ka nam Best Player la iohrah da ka Nazareen D. Sangma na West Khasi Hills District.
