Shillong, Naitung, 10: Ka Khun Hynñiewtrep National Awakening Movement (KHNAM) ka la ong ba kan sa tih bniah naduh tynrai ban lap ia ki buit sianti jong ka Sorkar Jylla ha kaba iadei bad ka jingpynbeit thymmai (Amendment) jong u snem bad ia ka Roster System.
“Ka jingialang jong ki seng sainpyrthei halor ka reservation policy kaba la long ha ka 31 tarik, Jymmang, 2023 ha Conference Room, Main Secretariat ka la shim ia ka rai ba baroh ki seng sainpyrthei kin phah ia ki jingai jingmut ba shongnia ba pynksan hapoh 15 sngi. Ka KHNAM ka ladep aiti ia ka jingai jingmut lyngba ka shithi No. KHNAM/CEC/2023-24/RP 31 tarik, Jymmang, 2023. Hynrei kaba sngewsih ban tip ka long ba katkum kaba paw ha ki lad pathai khubor ka Myntri jong ka tnat Aiñ ka ong ba ‘ym pat don satia kino kino ki seng sainpyrthei kiba phah ia ki jingai jingmut haduh mynta” la ong u Working President ka KHNAM u Bah Thomas Passah ha u kyrwoh ba la phah sha ki lad pathai khubor ha ka Lah Sngi U Blei.
“Kane ka long kum ka jingpynkhein ia ka rai ba la shim ha ka jingialang kaba la long ha ka 31 tarik, Jymmang, 2023 bad ka long ruh ka lynti ka bym dei. Ka jingpyrshang ban pynslem ia ki mat ba kongsan jong u paidbah kam dei shuh kaba dang thymmai bad ngin ym sngewphylla. Ha ka jingialang jong ki seng sainpyrthei ka KHNAM, UDP, HSPDP, VPP bad ka INC ki la pynpaw ia ka jingsngew ba ladei ban khmih bniah biang ia ka Reservation Policy 1972 kaba la rim shaba palat, hynrei kumba ka paw namarba ia kane ka kam la rah sha surok bad la jan baroh ki sngap jar ban iakren ia ki mat kiba donkam,” la ong u kyrwoh.
U Bah Passah u la ong, “ha ka jingialang jong ki seng sainpyrthei ngi la pynpaw ia ka jingsheptieng ba ka Expert Committee kan sa shu long tang ka buit ban pynslem bad ka ban pynsuki ia ka jingthmu ban khmih bniah ia ka Reservation Policy bad kumba ka paw mynta ka jingsheptieng jong ngi ka long shisha kaba dei. Hadien palat shi bnai hadien ka 31 tarik, Jymmang, 2023, ki kam ki la iaid suki kum ka mattah ia kaba ngim lah satia pdiang daleilei.”
“Ngi la iai pynpaw ia ka jingsngewkhia ha kaba iadei bad ka jingpyntreikam ia ka Roster System shadien da ka Sorkar. Ha ki jingialang ba bunsien, ka Sorkar ka la pyrshang ban ialam bakla ia ki seng sainpyrthei bad ia ki paidbah. Hynrei ha ka jingpynbna ba dang shen ia ka result kam Pulit ba la pynbna ha ka 28 tarik, Jylliew, 2023 la iohi ba 41.63% (420) ki Khasi-Jaintia ki la shah jied bad 46.18% (466) ki Garo ki la shah jied bad kane ka pynpaw ba ka result la pynbna da kaba pynshong nongrim ia ka Roster System kaba treikam shadien. Namarkata, ngi iaiban ba ka Office Memorandum ba thymmai kaba la pynmih ha ka 14 tarik, Jylliew, 2023 ka dei ka Roster jong ka Backlog ba la buhrieh namarba ia ka Data la shim naduh u snem 1972 lyngba ka Roster Register,” u la bynrap.
“Katkum ka jubab RTI ba la ioh pdiang na ka Personnel Department, Sorkar Meghalaya ha ka 5 tarik, Naitung, 2023, ngi la ioh jingtip ba ym pat don kawei ruh ka tnat treikam kaba la pynsdang ban buh ia ki Roster Registers. Namarkata, ka jingkylli ba shong ain ka ong ha kano ka rukom ka Sorkar ka lah ban pyntreikam ia ka roster system khlem ka Roster Register. Haba kylli, hato ka Office Memorandum kaba 14 tarik, Jylliew, 2023 ka la kdew ne em ia u bnai bad u snem ba la sdang ban pyntreikam ia ka Roster. Kumba ka paw, ka Sorkar kam shlan satia ban jubab,” la kynthoh u Working President ka KHNAM.
