Shillong, Naitung, 10: Lai tylli ki metiap jong ki lai ngut ki briew, ba kynthup ia kawei ka kynthei, la lap na kawei ka ing ba dang shna jong ka Institute of Science and Bio Resource (ISBR) ha ka shnong Umsawli, New Shillong Township ha ka janmiet sngi U Blei.
Ia kine ki lai ngut, la ithuh kyrteng kum ka Kong Sheba Kharbani (40 snem) kaba trei kum ka cleaner, u Bah Rupert Donbor Dohtdong (43 snem), bad u Blackstar Kharkrang (30 snem). Kine ki lai ngut ki dei kiba sah ha Mawlai Phudmawri.
La lap ia kine ki metiap na kane ka jaka, hadien ba la mih ka jingsma na kane ka iing ha kaba ki paidbah ki la pyntip mar mar sha ki bor pyniaid shnong jong ka shnong Umsawli.
Ia ka met jong ka Kong Sheba la lap na kawei ka kamra katba ia ka met jong ki arngut kiwei pat la lap na kawei ka kamra.
Ki Pulit kiba la pynlong ka jingtohkit, ki la lap kine ki lai ngut ki la bam ia u tit buid ba ladep shet uba ki la kheit na ka khlaw kaba don hajan. Ki Pulit ki la lap ruh ia u tit baladep shet ha u khiew ha kawei na ki kamra.
Hadien kane, ka kynhun ki Pulit jong ka Crime Scene Unit ki la leit mar mar sha kane ka jaka ban pynlong ia ka jingtohkit kaba bniah.
Ia ka met jong kine ki lai ngut la pynkit noh sha NEIGRIHMS Hospital ban leh ia ka post-mortem bad ki Pulit ki la register case ruh halor kane ka jingjia.
