Shillong, Naitung, 10: Ki bor ba dei khmih jong ka tnat Forest ka Sorkar Jylla ha ka step lah sngi u Blei ki la kyndang bad pynphra naphang ia ki dukan ba la pynlong iew shipor ha madan Umdiengpung, kaba don ha 7 Mer Upper Shillong.
U General Secretary jong ka San Shnong Youth Welfare Organisation (SSYWO) u Bah Lionel Nongkhlaw ha ka jingiakren bad ka Batesi TV u la kynthoh ba kumno ka tnat Forest ka kloi ban kyndang ia ki nongshong dukan ha Umdiengpun ba la ai jaka hi da ka Sorkar ban pynlong iew hadien ba ka jylla ka la mad ia ka jingshah lynshop ha ka jingpang khlam COViD-19 ha ki snem ba la leit noh.
Ha kajuh ka por ula buh jingkylli ruh ba kumno ka tnat Forest kam shym la nud ban kyndang ia ki bar jylla kiba sah beaiñ ha Mahadev Khola hadien ba ka Khasi Students Union (KSU) dang shen ka la ujor sha ka tnat Forest.
Ki nongshong dukan, ki la iathuh ba ka tnat Forest kam shym la ai jingtip satia shwa ban phah pynpra ia ki dukan kiba don ha Umdiengpun bad ha kane ka sngi, la sakhi ba ki nongtrei jong ka tnat Forest ki la ioh ban pynpra ia ki san tylli ki dukan tap shiliang bad bthah ruh ia kiwei ki nongdie dukan ba kin pynpra hi ia la ki jong ki dukan shwa ban shah pynpra da ka bor.
