Shillong, Lber, 27: U MLA jong ka North Shillong Constituency Bah Adelbert Nongrum ha ka sngi Baar u la phah da ka jingthoh sha u Symbud Myntri Rangbah uba khmih ia ka tnat Pynroi Sor Bah Sniawbhalang Dhar bad sha u Myntri ka tnat PHE u Marcuise N. Marak da ka jingkyrpad ba kin wad ia ki lad ki lynti ban weng ia ka jingkyrduh um ha ki shnong kiba dang hap hapoh ka North Shillong Constituency.
Ha ka shithi ba la phah sha ki arngut ki Myntri ka Sorkar Jylla, u Bah Nongrum u la iathuh ba kum u Nongmihkhmat paidbah u la ioh ka jingujor na ka Dorbar Shnong Jaiaw Pyllun, ka Riatsamthiah, Wahingdoh bad na kiwei kiwei de ki shnong kiba la mad ia ka jingkyrduh um ha kane ki sngi.
“Nga kyrpad ia ka tnat PHE bad ia ka tnat Urban Affairs ba kin iatreilang khnang ba ki paidbah nongshnong kin ym mad ia ki jingeh ha kaba iadei bad ka jingkyrduh ka umbam umdih ha kum kane ka aiom ba rang tyrkhong ka bneng,” u la ong.
U la kyntu ruh ba kin phah ia ki nongtrei ban wad ia ka daw tynrai halor ka jingkyrduh um bad ong ruh ba ki don ki jaka ba ka um ka shu shlei kai katba ki don pat ki jaka kiba mih duna bha ka um bad mad ruh ia ka jingtyrkhong.
