Shillong, Lber, 27: U nongialam jong ka Trinamool Congress u Zenith Sangma ha ka sngi Balang u la thep kyrteng na ka bynta ban iakhun ia ka elekshon Lok Sabha na Tura Parliamentary Seat ka ban sa long ha ka 19 tarik Iaiong, 2024.
Ia u Zenith Sangma, la synran lang da u hymmen jong u, u Mukul Sangma bad kiwei kiwei ki nongialam jong ka Trinamool Congress.
Haduh mynta, kiba thep kyrteng na Tura Seat ki long ka Sitting MP ka Agatha Sangma ka ban iakhun na ka National Peoples Party (NPP) bad u Saleng Sangma u ban iakhun na ka seng Congress.
Ka BJP dang shen ka la rai ban ym pyniengkyrtong bad pynbna ruh ban ai jingkyrshan ia ki kyrtong ka NPP ha Shillong bad ha Tura.
Ha Shillong Seat, kiba la thep kyrteng haduh mynta ki long ka Dr. Ampareen Lyngdoh kaba iakhun na ka National Peoples Party (NPP), u Sitting MP ka Shillong Seat Bah Vincent H. Pala na ka Indian National Congress (INC), u Bah Robert June Kharjahrin uba ïakhun kum u kyrtong monlang ka Regional Democratic Alliance (RDA), u Dr. Ricky AJ Syngkon na ka Voice of the Poeple Party (VPP) bad ki kyrtong shimet ba kynthup ia u Prof. Lakhon Kma, u Bah Peter Shallam.
Kane long ruh ka kynti kaba u Bah Vincent H. Pala un ïakhun ban shah jied biang kum u MP ka Shillong Seat hadien ba u la mihkhmat la lai samoi kynthih naduh u snem 2009.
Katkum ka jingpyntip jong u Returning Officer ka Shillong Seat, ka Seng Congress ka la phah thep kyrteng ruh u Bah Manuel Badwar kum u Stand-by Candidate.
