Shillong, Jymmang 17tarik, 2023: kum shi bynta ban kyntiew ia ka ioh ka kot lyngba ki mat treikam ba thymmai, u Myntri Rangbah ka Jylla u Conrad K Sangma ryngkat ka Myntri ba dei peit ia ka kam rep ha ka Jylla ka Dr. M Ampareen Lyngdoh, ki la leit ban jurip ia ki jingpyntreikam ia ki projek ba pher ba pher ha ki katto katne ki jaka ha East Khasi Hills district. Ha kawei na kine ki jing leit jurip, u Myntri Rangbah ka Jylla u la leit peit ia ka Tissue Culture Lab ha Bio-Resources Development Centre (BRDC) bad ia ka Kyrdemkhla Net house, kiba long kiba kongsan ha ka kam rep ha ka jylla. Ha kane ka jingleit jurip ha ka Wellness & Food Testing Site hajan ka pharm BRDC, u Conrad Sangma u la iakren bad ki nongioh bhah na ka tnat tourism, bad u la shim khia ruh ia ka jingkyrpad jong ki ban kham pynbha ia ki jingshna na ka bynta ban pynkiew ia ka ioh ka kot lyngba kane ka tnat. Shuh shuh u la leit jngoh ruh ia ka jing pyntrei ia ka surok Laitkor Pomlakrai Laitlyngkot, na ka bynta ban nang pynsuk pynjan ia ki jaka lyngba ki surok.
Ka BRDC’s Seed Secure Meghalaya project, ka buh ia ka thong ban pynkhlain ia ka jingpynmih ia ki symbai phan da ka ba pyndonkam ia ki lad ki lynti ki ba duna ka jingpyllut na ka bynta ban pynroi ia ka rukom thung phan ha ka thain. Kane ka kynhun ha kane ka shnat pynmih symbai ka la lah ban pynmih palat ia ka shi lak ki symbai ha ka shi snem, kaba tam bun ia kaba thmu ban pynmih. Kane ka rukom thung phan kan iarap ia ki nongrep ban lah ban pynmih kham bun ia ka jingmih ba ju ioh man ka snem.
Haba jurip ia kine ki jaka thung phan u myntri Rangbah ka jylla, u Conrad K Sangma u la bynrap, “nga da lyngngoh bad dap da ka jingkmen ban iohi ia ka jinglah ban pyntreikam ia kane ka projek hapoh ka Bio-Resources Development Centre, da ka jingiatreilang ki kynhun bapher, kan pynlong ia ka jylla kaba lah shisha ban kyntiew ia ka jylla ha ka kam rep.”
U la pynshlur ruh ia ka jingdonkam ban wan rah ia ki buit thymmai ban iarap shuh shuh ia ki nongrep lait na ka seng kam lajong kaba hap hapoh ka projek PRIME.
Da kaba shim khia ia ka jingkyrpad kiba pyntrei ia ki projek bapher ha ka liang ka kam jngoh kai pyrthei, ban pynbha ia ki jingtei bad jingshna, u Conrad K Sangma ym tang ba u la kular ban pynstet ia ka jingpyntreikam hynrei u la ai buit bad kyntu ruh ia ki ban pynmih kam na ka bynta la ki jong ki nongshong shnong ka thain ka kyntoit ba ki don, da ka ba pyntreikam ia ki kali bording ban pynshang ia ki nongleit jngohkai pyrthei bad ban die bam da ki kali ba la buh kyrpang.
Ka jingpyntreikam ia ka surok Laitkor-Pomlakrai-Laitlyngkot East Khasi Hills district, ka dei kawei na ki lad ki lynti jong ka sorkar jylla ban kyntiew ia ka thain, ha ka jingpyllut kaba 27.09 klur tyngka bad la thmu ban pyndep ha u bnai nohprah 2023 na ka bynta ka surok kaba jrong 11.52 km, la pyntreikam shaid shaid ia kane ka projek surok bad la khmih lynti ba kan pynsuk shibun ia ki nongleit nongwan bad kan pynjan sha ka NH-6 ban poi sha jylla Mizoram bad Assam, bad ka NH- 206 kaba pyniakynduh ia ka Guwahati bad Shillong. Kane ka surok kan long kaba iarap shibun ha ka ioh ka kot jong ka jylla bad kan pynduna ruh ia ka jingdheng kali kaba jur ha ki surok ha sor.
