Ka New York ka dei ka nongbah kaba riewspah tam ha ka pyrthei bad kane ka long katkum ka kaiphod ba la pynmih ha u 2023, ha nongbah New York ki don 3,40,000 ngut ki heh saipan kiba shong ba sah bad kane ka long katkum ka jinglap jong ka Henley & Patners. Hadien ka New York ka wan ka Tokyo kaba don 290,300 ngut ki heh saipan bud sa ka San Francisco Bay Area kaba don 285,000 ngut ki heh saipan kiba shong basah.
Katkum katei ka kaiphod la ong ba ki don 97 tylli ki nongbah kiba don ha ka thup jong ka nongbah ba riewspah tam ba kynthup na ki ri Africa, Australasia, CIS, East Asia, Europe, Middle East, North Maerica, South Asia bad SouthEast Asia. Kham bun na ki nongbah kiba riewspah ki don ha US kiba don haduh saw tylli ki nongbah kata ka New York, Bay Area, Los Angeles bad Chicago. Ha China ki don ar tylli ki nongbah kata ka Beijing bad ka Shanghai.
Ka London ka wan ha ka kyrdan kaba saw bad hangtei ki don 258,000 ngut ki heh saipan, bud sa ka Singapore kaba don 240,000 ki heh saipan, kham mynshuwa ka dei ka London kaba bat kum ka nongbah kaba riewspah tam hynrei mynta ka la hiar sha ka kyrdan kaba saw. Ka New York kaba don ïa ka kyrteng sin kum ka Big Apple ka kdup ïa ki 340,000 ngut ki heh saipan ne ki Millionaire, nangta 724 ngut ki Centi millionaire bad 58 ngut ki Billionaire.
