Ka St. Anthony’s College ka la long ka kynhun ban iohrah ia ka nam lahduh ha ka lympung ialehkai basketball ba la pynlong da ka Seng Khasi College kum shi bynta ka jingrakhe ia ka Jubili Ksiar jong ka College kaba la sdang ha ka 17 tarik bad ia kaba la pynkut noh ha ka 19 tarik u Iaiong, 2023.
Ka St. Anthony’s College ka la iohrah ia kane ka nam lahduh ha ka jingiakhun phainal pyrshah ia ka Seng Khasi College da kaba pynliem noh da 36 la 13 basket.
Ki don 7 tylli ki kynhun ialehkai jong ki College kiba don hapoh ka Sor Shillong kiba la iashim bynta ha kane ka lympung ialehkai basketball kiba kynthup ia ka St Anthony’s C ollege, ka St Mary’s College, ka Lady Keane college, ka Synod College, ka St. Edmunds College, ka Shillong Commerce College bad ka Seng Khasi College.
Ha ka sngi pynhap pyrda ia kane ka lympung ialehkai u Secretary jong ka Seng Khasi Kmie Mawkhar u Bah Highness Marbaniang u la long kum u Kongsan katba u Bah B.Rymnong u la long u Symbud Kongsan ha ryngkat ka jingsakhi lang jong u Principal ka Seng Khasi College u Bah W.B Rynjah, ki nonghikai bad ki samla pule.
