Shillong, Naitung, 07: Ka Hynñiewtrep Youths Council (HYC) East Jaintia Hills District Unit ka la pynpaw bad kren shai katba ka Sorkar kam pat lah ban wanrah da ki ain, ban tehlakam ia ka jingrung kyrthep jong ki poiwir, kum ka ILP lane kat bym pat ioh ia ka ILP ka aiñ ka ban iada ia ka jaidbynriew na ka jingshah tyllep noh na ki mynder kan nym pdiang ia ka lynti Rel.
“Ka Seng ka buh ha khmat ia ka jing iada ba paka ia ka jaidbynriew bad ha ka jingsngewthuh jong ngi lada wan ka lynti Rel kan pynsuk ia ki poiwir ban wan buhai shnong ha ka Bri u Hynñiewtrep lada ngim don ia ki ain iada ba biang, kum ka ILP,” ong u kyrwoh ba la phah da u President ka HYC East Jaiñtia Hills District Unit, u Bah Presios Pale.
“Ha kaba iadei ba ka jingkyntiew ia ki lynti iaid (Transportation), ka Seng ka ai jingmut ia ka Sorkar India bad ia ka Sorkar Meghalaya ba ki dei ban shna noh da ka surok saw laiñ (Four lane ) naduh Ratachera shaduh Umiam (Damsite) khang ba kan pynsuk ban kit ia ki mar ki mata bad ia ki briew kiba leit jingleit,” ong ka seng.
“Ka Seng ka kyntu ia baroh ki MLA, ki MDC, ia ki Daloi , ki Waheh Chnong, ki Sengbhalang bad ia ki paidbah ka rilum Jaiñtia ba ngin ieng tylli lang kawei ban pyrshah ia ka lynti Rel kat bym pat ioh ia ka ILP. Ngi dawa ia ka Sorkar India bad ia ka Sorkar Meghalaya ba kin pyntreikam noh ia ka ILP kaba dei ka lad jingiada ia ka jaidbynriew Hynniewtrep jong ngi,” ong shuh shuh u kyrwoh.
